Palestine: Mga napilitang lumikas sa West Bank, nananabik nang makauwi

Pero noong Oktubre 7, ang lahat ay nagbago para kay Hussein. "Natutulog ako noon nang pumasok sa kuwarto ko ang aking kaibigan. May kasama siyang isa pang lalaki at pinaghahampas nila ako ng kahoy at sinigawan ako. 'Pinapatay kami ng inyong mga kababayan samantalang natutulog kayo sa aming mga bahay!' Pinakawalan nila ang kanilang mga aso upang lapain ako. Pinagkakagat ako ng mga aso at winakwak ang aking katawan at ang aking tiyan."

Pagkatapos ng sampung minuto, nakatakas si Hussein, ngunit inabot siya ng tatlumpung minuto bago siya makarating sa isang ligtas na lugar.  

"Tinawagan ko ang isa ko pang kaibigang Israeli, at sinundo niya ako. Dinala niya ako sa bahay ng isa pa naming kaibigan, kung saan sampung araw akong nagtago sa dilim. Noong Oktubre 18, sumakay ako ng taxi patungong West Bank."

Dumating si Hussein sa Ramallah, ang pangunahing siyudad ng West Bank, at nagpasyang pumunta sa bandang hilaga, sa Jenin, kung saan daan-daang taga-Gaza ang namamalagi sa mga centre na pinapatakbo ng mga awtoridad na Palestino.  

Pumupunta ang aming mga team sa mga centre na ito upang magbigay ng mga donasyong medikal, kagaya ng mga gamot para sa mga di nakahahawang sakit, at magbigay ng suporta para sa kalusugang pangkaisipan. Ayon sa ilang mga pasyente, sila’y binugbog, pinahiya at inabuso ng mga Israeli habang sila’y nakakulong mula pa noong Oktubre 7.  

"Napakabait ng mga tao rito. Hindi ko inaasahanag mangyayari ito," sabi ni Hussein. "Nasa siyudad ng Gaza ang pamilya ko. Doon nakatira ang aking asawa at mga anak. Minsa’y natatawagan ko sila, at nakakausap sa telepono. Kinukuwento nila sa akin ang sitwasyon doon. Kinikilabutan ako sa mga nangyari."

"Gusto ko lang mabuhay nang mapayapa. Ayaw naming makaabala ng tao, at umaasa kaming wala ring aabala sa amin. Gusto namin –ako, ng aking pamilya, mga anak at apo—ng mapayapang pamumuhay. Ang Palestine ang aking bayan, kahit nasaan ako, ito pa rin ang aking tahanan. Gusto ko nang makapiling ang aking pamilya sa Gaza." 

Naniniwala si Hussein na hindi na siya makababalik sa Ashdod, ang siyudad kung saan siya dating nagtatrabaho.   

"Hindi na makababalik pa sa dati ang sitwasyon," sabi niya.  

*Pinalitan ang kanyang pangalan para sa kanyang proteksyon.