West Bank: Nanganganib ang access sa pangangalagang medikal habang tumitindi ang pagsalakay ng mga Israeli

“Sa kasalukuyan, ang aming staff ay nakararanas ng paghihigpit sa kanilang pagkilos upang makapagbigay ng tuwirang suporta sa mga tao. Ang naibibigay pa lang namin ay emergency psychological first aid sa Tulkarm at donasyon [ng medical supplies, gatas para sa mga sanggol, at mga lampin] sa Jenin," sabi ng Project Coordinator ng Doctors Without Borders na si Caroline Willemen.

Sa Hebron, hinaharangan ng mga puwersang Israeli ang mga nais pumasok o lumabas ng siyudad, kung kaya’t di makapagpatakbo ang mga team ng Doctors Without Borders ng mga mobile clinic at di rin nila masuportahan ang maternity clinic ng Doctors Without Borders sa labas ng siyudad. Samantala, bagama’t ang klinika ng Doctors Without Borders sa loob ng siyudad ay bukas upang magbigay ng pangangalagang medikal, nangangamba ang mga pasyenteng pumunta roon dahil sa mga blockade at pakiramdam ng kawalan ng seguridad.

Sa Jenin at Tulkarm, paulit-ulit na sinasalakay ang mga ambulansya at mga health worker, at dahil dito’y nalalagay sa alanganin ang mga aktibidad medikal. Pagkatapos ng walong araw ng paglusob, dumarami ang mga pangangailangan, lalo na sa mga kampo. Malinaw na kailangan ng karagdagang pagtugong humanitarian.

“Sa Jenin, may mga armored vehicle ang mga Israeli na nakatalaga sa mga pasukan ng ospital ng Khalil Suleiman, isang pasilidad na sinusuportahan ng Doctors Without Borders. Nakikipagbuno ang staff ng ospital upang maipagpatuloy ang mga aktibidad sa kabila ng kakulangan ng kuryente at tubig,” sabi ni Willemen. 

Ikinuwento naman ng isa pang paramedic na nagsanay rin sa ilalim ng Doctors Without Borders kung paanong pinasok ng mga sundalong Israeli ang kanyang tahanan at pinagbantaan siya.  “SInira ng mga puwersang Israeli ang pinto ng bahay ko. Ilang beses kong sinabi sa kanila na boluntaryo ako ng mga organisasyong medikal, ngunit kinalakadkad pa rin nila ako palabas, sinipa sa likod at pagkatapos ay tinutukan ng baril sa ulo.” 

Ang mga huling pagsalakay sa West Bank ay ang mga pinakamatindi mula noong 2002.  Mula Agosto 28 hanggang Setyembre 5, 39 na Palestino na ang napatay at 140 ang nagtamo ng pinsala, ayon sa Ministry of Health. Ang mga pagsalakay na ito ay bahagi lang ng mas malawak na karahasan na lubhang lumala mula noong nag-umpisa ang digmaan sa Gaza. Mahigit 652 na Palestino na ang napatay sa West Bank mula noong Oktubre 2023. 

Hinihingi ng Doctors Without Borders na ano man ang mangyari, dapat protektahan ang mga sibilyan, mga health worker, mga ambulansya, mga pasilidad pangkalusugan, at mga ospital. Bilang mga mananakop, kinakailangang tuparin ng mga awtoridad na Israeli ang kanilang mga obligasyon alinsunod sa international humanitarian law upang magarantiyahan na walang hahadlang sa pagkuha ng mga tao ng pangangalagang pangkalusugan at ng iba pang mahahalagang serbisyo sa West Bank.