Ang pagtutulak ng mga puwersang Israeli sa mga tao mula sa hilaga patungong timog na bahagi ng Gaza ay magpapalala lamang sa humanitarian catastrophe

“Bigla na lang akong sinabihan na kailangan naming lumipat mula sa tinitirhan namin sa hilaga,” sabi ni Mahmoud, isang watchman ng Doctors Without Borders, na nilisan ang Jabalia noong gabi upang makitira sa guest house ng Doctors Without Borders sa Gaza City. “Iniwan namin ang aming tahanan nang walang pag-asa, sa ilalim ng banta ng pagbobomba, mga pinapasabog na missile at mga pinapaputok na artillery. Napakahirap ng sitwasyon namin. Mas gugustuhin ko pang mamatay kaysa lumipat sa timog; naririto ang tahanan ko, at ayaw kong lisanin ito.”

Iniutos din ng mga puwersang Israeli ang pag-alis ng mga tao sa tatlong pangunahing ospital sa hilagang Gaza, ang Indonesian, Kamal Adwan at Al-Awda. Ang mga ito ay tumatakbo para sa pinakamaliit na kapasidad at may 317 na pasyenteng nasa ospital pa rin, at may mga 80 na pasyenteng nasa intensive care at hindi mailipat, ayon sa Ministry of Health. Ang tatlong pasilidad medikal na ito, pati na rin ang ibang mga bahagyang gumaganang pasilidad sa Strip, ay dapat maprotektahan.  

Ang klinika ng Doctors Without Borders sa Gaza City ay nakatanggap ng 255 na pasyente nitong Linggo at Lunes lamang, dahil sa pakaunti nang pakaunti ang access ng mga tao sa pangangalagang medikal. Para sa ilang tao, hindi na posible ang makakuha ng access sa mga pasilidad pangkalusugan. Ang aming mga team ay nakatanggap ng mga ulat tungkol sa mga sugatang tao na namatay dahil sa hindi sila makakuha ng pangangalagang medikal. 

Kabilang sa mga pinapalikas mula sa hilaga ay ang pitong staff ng Doctors Without Borders na nakikitira sa Gaza City. May lima pang hindi makaalis ng Jabalia, kung saan nagsasagawa pa ang mga puwersang Israeli ng mga pagsalakay.

“Ang pinakahuling pagkilos upang maitulak ang libo-libong tao mula sa hilagang Gaza patungong timog ay ang pagbabago ng hilaga upang gawin itong tila walang buhay na disyerto, habang pinapalala ang sitwasyon sa timog, kung saan isang milyong tao na ang isiniksik sa isang maliit na bahagi ng Gaza Strip at namumuhay sa mga kondisyong kahindik-hindik,” sabi ni Sarah Vuylsteke, ang Project Coordinator ng Doctors Without Borders sa Gaza.

“Halos wala nang access ang mga tao sa tubig, pangangalagang pangkalusugan, at sa kaligtasan, kung kaya’t ang pagdagdag ng mga tao rito ay hindi na namin maisip,” sabi ni Vuylsteke. “Nitong nakaraang labindalawang buwan, ang mga tao ay nakaranas ng walang patid na pagkawala ng matitirhan, at walang humpay na pagbobomba. Tama na, kailangang tigilan na ito ngayon.”

Kamakailan lang, ang mga awtoridad na Israeli ay nagdeklara ng kaunting paglaki ng tinatawag nilang humanitarian zone, ngunit ito’y sumasailalim pa rin sa mga utos ng paglikas at hindi pa rin ito ligtas mula sa pagbobomba. Marami sa mga taong nakatira sa zone na ito ay nagdurusa mula sa mga sakit sa balat at mga respiratory infection dahil sa mga kalunos-lunos na kondisyon ng pamumuhay. Ang sitwasyon ay mas lalong nakababahala ngayong parating na ang taglamig at ang mga tao’y malalantad sa lubhang mababang temperatura.

Dapat nang tigilan ng mga puwersang Israeli ang mga kautusan sa pagpapalikas mula sa hilagang Gaza. Ang walang habas na pagpatay sa mga tao sa Gaza ay dapat nang tigilan, at dapat maipatupad sa lalong madaling panahon ang isang pananatiliing ceasefire.