Ang sitwasyon sa Gaza ay umabot na sa kritikal na puntong humanitarian.
Huling Ulat
Tinuligsa ng Doctors Without Borders/Médecins Sans Frontières (MSF) ang muling pagdanak ng dugo sa Gaza, habang ang aming mga team ay patuloy sa paggamot ng mga Palestinong nagtamo ng malulubhang pinsala sanhi ng mga Israeli airstrike at pagsalakay gamit ang mga quadcopter noong Nobyembre 19, kung saan dose-dosena ang namatay at higit pa roon ang mga nasugatan. Mula noong Miyerkules, ang aming mga team ay nakapagbigay-lunas sa mga kababaihan at mga batang may mga open fracture at tama ng bala sa kanilang mga braso o binti, at maging sa ulo.
Susuportahan mo ba ang aming emergency response?
Tulungan kaming makapagbigay ng makasagip-buhay na pangangalagang medikal sa mga emergency sa pamamagitan ng pagbibigay ng donasyon ngayon.
Dalawang Taon ng Digmaan sa Gaza
Noong Oktubre 7, 2023, naglunsad ang Hamas ng nakamamatay na pagsalakay sa Israel, kung saan 1,200 na tao ang napatay at 251 ang dinukot upang gawing hostage. Bilang tugon, sinimulan ng Israel ang isang malaking opensang militar sa Gaza at simula noo’y nakapatay na sila ng mahigit 66,000 na tao, nagdulot ng pinsala sa mahigit 168,000, at pinuwersa ang mahigit sa 2 milyong Palestino na lisanin ang kanilang mga tahanan.
Nitong nakaraang dalawang taon, ang Gaza ay lubhang napinsala. Winasak ng mga Israeli ang mga ospital, tirahan, at mga mahahalagang imprastruktura. Milyon-milyon ang lumalaban upang mabuhay, dahil wala na silang mapagkukunan ng pagkain, malinis na tubig, at mga gamot. Nagdeklara na ng taggutom sa Northern Gaza — isang krisis na sanhi ng pagbangkulong ng Israel at ang paggamit nito sa pagpapagutom bilang sandata sa digmaan.
Napakalaki ng mga pangangailangang pangkalusugan para sa katawan at sa kaisipan. Matapos ang dalawang taon ng walang humpay na karahasan, nasasaksihan ng mundo ang inilalarawan nila bilang pagpuksa sa lahi ng mga Palestino.
Sitwasyon sa Gaza
Mahigit sa 85% ng populasyon sa Gaza ang nawalan ng tirahan, marami sa kanila ang nakatira sa mga siksikan at di ligtas na masisilungan, o sa labas kung saan kakaunti ang mapagkukunan ng malinis na tubig o sanitasyon.
Sa kabila ng paulit-ulit na panawagan ng UN at ng International Court of Justice (ICJ) para sa isang ceasefire at hindi hahadlangang paghatid ng humanitarian aid, patuloy ang mga puwersang Israeli sa matitinding pagsalakay na naging sanhi ng pagkawasak ng mga lugar at imprastruktura para sa mga sibilyan. Ang pagkubkob at pagbangkulong ay nagdulot ng pagkawala ng kuryente, pagkain, fuel, at aid, kung kaya’t naiiwan ang mga tao nang walang mga pangunahing serbisyo — isang sitwasyong katumbas ng kolektibong pagpaparusa.
Mula Oktubre 2023, mahigit sa 66,000 na tao na ang pinatay at mahigit 160,000 na ang sinaktan, ayon sa Ministry of Health. Kabilang sa mga nasawi ay mga kasamahan namin sa Doctors Without Borders. Pinatay sila habang nagtatrabaho o habang nagkukubli kasama ang kanilang pamilya, isang kalunos-lunos na paalala na sinasalakay ang pangangalagang pangkalusugan at may kagyat na pangangailangan para sa ligtas na madadaanan ng humanitarian aid papasok sa Gaza.
In Memoriam: Pag-alala sa aming mga kasamahang nasawi sa Gaza
Ang Doctors Without Borders ay nakasaksi ng paulit-ulit na pagsalakay sa mga ospital at mga pasilidad medikal, na nagtutulak sa sistemang pangkalusugan ng Gaza sa bingit ng pagguho. Pagdating ng Agosto 2025, wala nang ospital ang ganap na gumagana, at 14 sa 36 na ospital na lang ang naiwang bahagyang gumagana.
Samantala, ang pamamahagi ng pagkain sa ilalim ng pangangasiwa ng Israeli-US Gaza Humanitarian Foundation (GHF) ay nakamamatay. Ang mga taong sumusubok makakuha ng limitadong aid ay pinapaslang o sinasaktan.
Matapos ang mahigit dalawang taong digmaan, ang mga Palestino sa Gaza ay nahaharap pa rin sa pagkagutom, mga sakit, at araw-araw na pagbobomba. Walang naiiwang ligtas na lugar sa gitna ng kanilang dumaraming mga pangangailangang humanitarian.
Pangangailangan para sa agarang paglikas medikal
Ayon sa World Health Organization, mahigit sa18,500 na tao ang kasalukuyang naghihintay na mailikas mula sa Gaza upang makakuha ng atensyong medikal, at 22% sa kanila ay mga bata. Ang makasagip-buhay na paggamot na kinakailangan ng mga pasyenteng ito ay hindi nila makukuha sa Strip. Dapat ay kumilos ang mga awtoridad na Israeli upang mabigyang-daan ang mga medikal na paglikas ng lahat ng mga pasyenteng nangangailangan nito, at dapat ding payagan nilang sumama sa paglikas ang isa o higit pang tagapangalaga kada pasyente.
Ayon sa tala ng Ministry of Health, mula Hulyo 2024 hanggang Nobyembre 2025, 1,092 na mga pasyente ang namatay habang naghihintay na mailikas. Malamang, higit pa rito ang aktuwal na bilang, dahil ito ay batay lamang sa mga opisyal na naitalang pagkamatay.
Bagama’t ang ilang mga bansa tulad ng Egypt, Qatar, United Arab Emirates, Türkiye, at Jordan, ay umako na ng responsibilidad sa pamamagitan ng pagtanggap ng mga pasyente sa kanilang mga ospital, marami pa ring ibang bansa na kakaunti lamang, o di kaya’y wala talagang tinatanggap na mga pasyente. Ang ganitong kakulangan ng pagkilos ay hindi makatuwiran.
Isang buwan na ang marupok na ceasefire, at ang sitwasyon sa Gaza ay nananatiling desperado. Ang mga Palestino ay pinapatay at sinasaktan pa rin ng mga puwersang Israeli halos araw-araw sa mga lugar na malapit sa yellow line. Sa likod ng linyang ito ay nananatiling makapangyarihan ang Israel. Kadalasan ay nailalagay ng mga Palestino ang kanilang buhay sa panganib dahil bumabalik sila upang hanapin ang kanilang mga tirahan habang di pa malinaw ang pagkakamarka ng linya. Ang isa pang nagpapasama sa sitwasyon ay ang lokasyon ng mga pangunahing ospital na nasa mga lugar na kontrolado ng mga puwersang Israeli. Ito’y nangangahulugan na nabawasang muli ng ligtas na mapagkukunan ng pangangalagang pangkalusugan. Napakalaki ng mga pangangailangan, at ang mga tao’y nakararanas ng pagdurusa na maaari namang iwasan.Caroline Seguin, Emergency Coordinator
Pinakahuling balita
Mapa ng mga kasulukuyang tugon sa Gaza at West Bank
- Mga outpatient consultation: 1,446,081
- Mga emergency presentation: 499,758
- Mga taong ginamot para sa diarrhoea: 88,474
- Mga isinagawang operasyon: 29,465
- Mga tinanggap na pasyente: 72,529
- Mga konsultasyon ng mga nagdadalang tao: 77,954
- Mga pagpapaanak: 19,500
- Mga indibidwal na konsultasyon para sa kalusugang pangkaisipan: 83,58
- Mga konsultasyon para sa mga hindi nakahahawang sakit: 107,516
- Ano ang mga kasalukuyang medikal na aktibidad ng Doctors Without Borders sa Gaza?
Kasalukuyan, mayroon kaming mahigit sa 1,000 na staff sa Gaza at mahigit 170 sa West Bank. Nagbibigay sila ng mahahalagang serbisyong medikal, kabilang ang mga sumusunod:
- surgical support
- pangangalaga sa mga sugat
- physiotherapy
- maternity at paediatric care
- pangunahing pangangalagang pangkalusugan
- pagbabakuna
- mga serbisyo para sa kalusugang pangkaisipan
- inpatient care
- pamamahagi ng tubig
Ang mga sumusunod ay ang mga ospital, klinika, at mga medical point na kasalukuyang sinusuportahan ng aming mga team sa South, Middle, at North Gaza:
- South Gaza: Nasser Hospital sa Khan Younis; Al Mawasi PHCC; Khan Younis PHCC; Al-Attar PHCC; Al Warara inpatient feeding centre
- Middle Area: Al-Aqsa Hospital; Doctors Without Borders Wound Care Clinic sa MOH Deir Al-Balah PHCC; Al-Zawaida Field Hospital; Deir Al-Balah MFH Field Hospital; Al Qarara SRH Clinic; Bureij PHCC.
- North Gaza: Al-Helou Maternity Hospital; Al-Shifa Hospital; Al-Ahli Hospital; Al-Rantisi Hospital; dalawang klinika ng Doctors Without Borders sa Gaza City; mga medical point sa Kamal Adwan, Al Rahma, Tel Al-Rabe’e School, Al-Yarmouk, Al-Karama, at Zaytoun Advanced Medical Point.
- Ano ang mga nakikita ng Doctors Without Borders na pangangailangang medikal sa Gaza?
Lubhang marami ang mga pangangailangang medikal sa Gaza. Ang mga ito’y hindi lang para sa mga taong nagtamo ng pinsala dahil sa mga pagsalakay, kundi para rin sa mga batang may malnutrisyon, mga nagdadalang taong kababaihan, mga nakatatanda, at ang mga may talamak na sakit. Nagiging lalong mahirap ang pagbibigay ng pangangalaga dahil sa matinding pinsala sa sistemang pangkalusugan ng Gaza, paulit-ulit na pagsalakay sa mga pasilidad pangkalusugan at sa mga staff nito, at ang mga kritikal na kakulangan sa gamot at sa kagamitang medikal. Tumutugon ang aming mga team sa mga sumusunod na pangangailangang medikal:
- Malnutrisyon
- Pangangalaga para sa mga sugat at pagkasunog sanhi ng digmaan
- Mga impeksyon at mga sakit
- Pediatric care
- Maternal care
- Mga gamot at medical supplies
Paano tumutugon ang Doctors Without Borders sa Gaza?
(Mula Oktubre 2023 hanggang Nobyembre 2025)
Naninindigan pa rin ang Doctors Without Borders na ito’y mananatiling tagapagbigay ng pangangalagang medikal sa Gaza. Ang aming mga team ay kasalukuyang sumusuporta sa anim na ospital, nagpapatakbo ng dalawang ospital sa Deir Al-Balah, at nasa apat na primary healthcare centre (PHCC) sa Gaza Strip. Nagpapatakbo rin ang Doctors Without Borders ng isang inpatient feeding centre na may 16 na kama, at kamakailan lamang ay nagbukas ito ng anim na bagong medical point na nagbibigay ng pangangalaga para sa mga sugat at iba pang mga serbisyo para sa pangunahing pangangalagang pangkalusugan.
Ang bilang ng mga nagawa ng Doctors Without Borders:
Tubig at kalinisan
Ang pagkubkob ng mga awtoridad na Israeli sa Gaza ay nagdulot ng paghihigpit sa pagpasok ng gasolina at mga supply ng kuryente, na nakapapatid ng pagtakbo ng mga planta ng tubig, at nalilimitahan ang abilidad ng mga organisasyon na makapaghatid ng tubig sa pamamagitan ng mga trak. Ang kakulangan ng tubig, hygiene, at sanitasyon sa Gaza ay maaaring magdulot ng nakapipinsalang disease outbreak, kung saan manganganib ang dati nang mahinang populasyon. Noong Enero 2025, namahagi ang Doctors Without Borders ng mahigit sa 1,400,000 na litro ng tubig kada araw sa pamamagitan ng mga water truck at desalinisation sa mahigit 64 na mga water point sa Al Mawasi, Khan Younis, Rafah, at Deir Al Balah. Patuloy kaming nagsusumikap na dagdagan ito, sapagka’t ang ligtas na inuming tubig ay mahirap makuha. Ang Gaza ay walang sariling kapasidad para makagawa ng maiinom na tubig. Ang tubig mula sa ilalim ng lupa ay masyadong maalat o kontaminado ng dumi mula sa alkantarilya at mga kemikal na pang-agrikultura upang maging ligtas na inumin ng tao.
Matagal nang nagsisikap ang Doctors Without Borders na mabigyan ang mga tao ng Gaza ng mga mapagkukunan ng ligtas na inuming tubig sa pamamagitan ng pagsuporta ng mga planta para sa desalination, paghahatid ng mga trak ng tubig, at pagtatatag ng mga pasilidad ng tubig. Sa pamamagitan ng pagpapahatid ng mga trak ng tubig at pagsuporta sa mga desalination plant, namahagi ang Doctors Without Borders ng 5.3 milyon na litro ng tubig, at nakapagbigay sa 31,369 na tao ng 6 na litro ng inuming tubig kada araw noong Oktubre 2025.
Subali’t noong Setyembre, lubhang naapektuhan ang aming trabaho dahil sa paglusob ng mga militar na Israeli sa Gaza City. Maraming mga planta para sa desalination ang kinailangang ilipat sa timog para sa kaligtasan ng mga ito, na nakapagpabawas sa aming inilalabas na tubig sa isang-katlo na lamang ng dating produksyon. Hindi makapaghatid nang maayos ang aming mga trak dahil sa pagtanggi ng mga Israeli na makipag-ugnayan at magbigay ng proteksyon. Isa sa aming mga trak ay sinalakay pa habang naghahatid ng tubig.
Bilang resulta, kinailangan naming tigilan ang mga pagkilos sa Northern Gaza, at nag-iwan ng daan-daang libong mga tao na walang mapagkukunan ng malinis na tubig, habang patuloy ang limitadong produksyon at pamamahagi ng tubig sa gitna at timog na bahagi ng Strip.
Supply at logistics
Sa pagtatapos ng Hunyo 2024, nakapagpadala ang Doctors Without Borders ng pitong cargo, o kabuuang bilang na 73 na trak sa Gaza sa tulong ng United Nations. Ang Rafah crossing point na dating pangunahing lagusan ng humanitarian aid ay sarado na mula pa noong nagsimula ang Mayo. Ito ay nagbunga ng mahahabang pila ng trak at mga mapanganib na pagkaantala ng paghatid ng humanitarian assistance sa iba’t ibang bahagi ng Gaza.
Kada buwan, nakapaghahatid kami ng medical supplies, tulad ng mga gamot, surgical kit, mga kagamitan para sa lohistiko, at humanitarian aid. Kabilang rito ang isang inupahang eroplano at kaunting mga kagamitang binili sa lugar. Subali’t ang pagdadala ng supplies papasok sa Gaza ay lubhang mahirap dahil sa mga paghahadlang ng administrasyon, mga paghihigpit sa paglalakbay, at sa kakulangan ng mga daan para sa pagtawid.
Ano ang mga hinihingi ng Doctors Without Borders?
- Tigilan ang pagpuksa ng lahi ng mga Palestino sa Gaza.
- Tigilan ang ethnic cleansing at ang sapilitang pagpapaalis sa mga tirahan.
- Magkaroon ng agaran at pananatiliing ceasefire.
- Wakasan ang pagkubkob at pahintulutan ang agaran at hindi hahadlangang paghahatid ng maramihang humanitarian aid nang walang kinikilingan.
- Tigilan ang pagsalakay sa mga pasilidad medikal at mga health worker.
- Buwagin ang Gaza Humanitarian Foundation.
- Pahintulutan ang mga medikal na paglilikas para sa mga nangangailangan ng kagyat na pangangalaga.
- Tigilan ang kalakalan ng mga armas na pumapatay at nagdudulot ng malubhang pinsala sa aming mga pasyente.
- Anong nangyayari sa West Bank?
Mula noong Oktubre 2023, lumala ang karahasan sa okupadong West Bank. Lalo pa itong tumindi noong 2025 dahil sa kampanyang ‘Iron Wall’ na naging sanhi ng pagkawala ng tirahan ng mahigit 40,000 na Palestino sa Northern West Bank. Sa pagpapatuloy ng pananakop ng Israel sa West Bank, patuloy rin ang paglala ng mararahas na aktibidad ng mga puwersang Israeli at ng mga dayo, mga paghihigpit sa pagkilos, paghadlang sa pangangalagang pangkalusugan at sapilitang pagpapaalis ng mga Palestino sa kanilang mga tirahan.
- Paano tumutugon ang Doctors Without Borders sa West Bank?
Sa West Bank ay nagsasagawa kami ng mga aktibidad na nakatuon sa emergency care at sa pangangalaga para sa kalusugang pangkaisipan sa Hebron, Nablus, Tulkarem at sa Jenin.
Nablus: Nagbibigay ang Doctors Without Borders ng psychological at psychiatric therapy, at pangangalagang seksuwal at reproductive health sa Nablus, Qalqiliya at Tubas sa kabila ng pinatinding paghihigpit sa pagkilos. Sa pamamagitan ng pakikipagtulungan sa lokal na organisasyon, naglungsad kami ng pangatlong pagsasanay para sa mga intern, na nagaalok ng 770 na oras ng theoretical at practical training.
Ang aming mga team ay nagbiibigay ng pagsasanay sa mga boluntaryo mula sa Palestine Red Crescent Society (PRCS) bilang mga unang mga tumutugon, at nagtaguyod ng anim na stabilization point para mapabuti ang access sa agarang pangangalagang medikal. Bukod dito, nagsasanay ang Doctors Without Borders ng mga doktor at nars sa tatlong ospital upang mapahusay ang kanilang pagtugon sa trauma. Mula pa noong Hulyo, isang mobile team ang naghahatid ng pangunahing serbisyong pangkalusugan sa anim na lokasyon, bilang suporta sa mga umiiral na PHCC sa gitna ng kakulangan sa tauhan, access, at gamot.
Noong Marso 2025, sa tulong ng UNWRA, ang aming mga team ay nagbigay ng 100 na mga hygiene kit sa kampo ng Al Far’a.
Hebron: Ang Doctors Without Borders ay nagpapatakbo ng 16 na mobile clinic na nagbibigay ng pangunahing pangangalagang pangkalusugan, mga serbisyong kaugnay ng sexual and reproductive health, at suporta para sa kalusugang pangkaisipan. Sinusuportahan din ng aming mga team ang apat na ospital sa pamamagitan ng pagbibigay ng mga pagsasanay at medical supplies. Tinutulungan din namin ang mga komunidad at mga kampo sa pamamagitan ng pamamahagi ng mga first aid kit at pagbibigay ng mga pagsasanay.
Nagbibigay ang Doctors Without Borders ng psychological first aid, psychiatric care, at counselling. Ang mga aktibidad ay ginaganap sa Hebron City at sa mga lugar sa paligid nito. Kabilang sa mga lugar na ito ang Dura, Bani Naim, Yatta, at Masafer Yatta. Nagpapatakbo rin ang Doctors Without Borders ng mga ligtas na mga community space, namamahagi ng mga relief item, mga hygiene kit, at mga portable toilet, at nagtatayo ng mga imprastraktura para sa tubig ng mga taong naapektuhan ng karahasan at ng sapilitang paglikas.
Jenin & Tulkarem: Sa Tulkarem at Jenin, ang aming mga team ay nagbibigay ng mga medical at humanitarian support sa mga taong nawalan ng tirahan at sa mga komunidad kung saan sila nakatira ngayon. Kabilang rito ang pagpapatakbo ng mga mobile clinic sa mahigit 40 na lugar araw-araw, pagsuporta sa mga shelter at mga klinika ng MoH, at pagbibigay ng pangangalaga para sa mga chronic at acute na kondisyon, at pagahahatid ng mga serbisyo para sa kalusugang pangkaisipan.
Mula Hunyo 2025, pinalawak namin ang mga pagsusumikap na makapaghatid ng psychological first aid bilang pagtugon sa pagtindi ng karahasan sa mga nakapaligid na barangay.
Ang aming mga team ay naghahatid ng mahahalagang supplies: tubig (mahigit 2.5 milyong litro), gasolina (10,000 na litro), mga food parcel, mga hygiene kit, beddings, mga diaper, at mga damit. Sa pakikipagtulungan sa aming mga katuwang, sinusuportahan namin ang mga pamilyang nangangailangan sa pamamagitan ng mga voucher na hindi nakababawas sa kanilang dignidad at binibigyan sila ng mapagpipilian. Kabilang rin sa aming pagtugon ang suporta para sa imprastruktura kagaya ng pagbigay ng generator sa isang klinika ng UNRWA upang mapanatili ang temperatura para sa pag-imbak ng bakuna.
Tunghayan ang conflict timeline
Maari niyo ba'ng suportahan ang aming emergency response?
Tulungan kami sa paghatid ng tulong. Mag-donate na.