Gaza: Nananawagan ang Doctors Without Borders para sa proteksyon at ligtas na paglikas ng mga pasyente mula sa Nasser Hospital

May mga 130 na pasyente at hindi bababa sa labinlimang healthcare workers ang nasa ospital pa rin kahit na walang kuryente o tubig doon, at limitado ang pagkain. Ayon sa United Nations, nakapaglipat na sila ng 32 na pasyenteng nasa kritikal na kondisyon, at nagsusumikap silang ililipat ang iba pa sa mga susunod na araw. Ang Doctors Without Borders ay labis na nag-aalala para sa kapakanan ng mga pasyenteng ito at umaasang sila’y maililikas nang ligtas. Ang aming mga team sa al-Aqsa Hospital at Rafah Indonesian Field Hospital ay handang gamutin sila kung kinakailangan.

Noong madaling araw ng Pebrero 15, isang shell ang sumabog sa orthopedic department ng pasilidad. Ito’y nagdulot ng kaguluhan, at naging sanhi ng pagkamatay at pagkakaroon ng pinsala ng hindi pa natitiyak na bilang ng mga tao. Dahil sa pangangamba para sa kanilang mga buhay, ang mga staff ng Doctors Without Borders ay kinailangang umalis mula sa compound at iwan ang ilang mga pasyenteng nasa malalang kalagayan. Kakaunti ang aming impormasyon ukol sa mga natirang medical staff at mga pasyente, pati na rin ang kanilang mga kondisyon.

Kasunod ito ng ilang linggo ng mga matinding labanan malapit sa ospital, kung saan nasukol ang maraming medical staff, mga pasyente at iba pang tao nang walang gaanong access sa mga kinakailangang supply. Maraming mga taong nasugatan ng mga matinding pagbobomba sa Khan Younis ay hindi rin makapunta sa ospital para sa emergency care.

Apat na araw pagkatapos ng pagsalakay, wala pa ring balita ang Doctors Without Borders mula sa dalawa sa aming mga staff member na nasa ospital noong nangyari ang insidente. Wala pa ring nakakaalam ng kinaroroonan ng isa sa kanila, samantalang ang isa naman ay ikinulong sa checkpoint ng mga puwersang Israeli habang siya’y nagtatangkang umalis sa Nasser Hospital. Humihingi kami sa mga awtoridad na Israeli ng impormasyon tungkol sa kanilang kinaroroonan at hinihiling namin na panatilihin silang ligtas at protektahan ang kanilang dignidad.