Gaza: Ang mga nagdadalang-taong nawalan ng tirahan ay nanganganib dahil sa mga miserableng kondisyon ng pamumuhay sa Rafah

Sa harap ng nakakapuspos na pagdami ng pangangailangan at kakulangan ng kapasidad para matugunan ang mga ito, ang nabibigyang-atensyon na lang ng Emirati Hospital ay ang mga pinakadelikado at nakamamatay na panganganak. Lubos na nababahala ang mga team ng Doctors Without Borders / Médecins Sans Frontières (MSF) sa unti-unting pagkasira at ang kinauuwiang kakulangan ng obstetric care sa Gaza dahil sa walang patid na pagbobomba, mga paghihigpit sa humanitarian aid, at mga pagsalakay sa mga pasilidad para sa pangangalagang pangkalusugan.

“Sa dami ng mga taong nawalan ng tirahan, nakakatakot na ang sitwasyon sa Rafah,” sabi ni Pascale Coissard, ang Doctors Without Borders emergency coordinator sa Gaza. “Siksikan na ang lahat ng lugar—nakatira ang mga tao sa mga tolda, mga paaralan, at mga ospital. Ang Emirati hospital ay kasalukuyang nakatatanggap ng tatlong ulit ng dami ng bilang ng mga panganganak kumpara sa mga hinarap nila bago ang digmaan.”

Dahil sa humanitarian crisis sa Gaza, ilang buwang hindi nakakapagpatingin ang mga nagdadalang-tao sa doktor. Walang mapagkukunan ng mga pangunahing serbisyo para sa pangangalagang pangkalusugan at ang mga babaeng manganganak ay hindi makapunta sa ospital dahil sa kakulangan ng transportasyon at kapasidad ng iilang natitirang mga ospital. Nakalulungkot ang kondisyon ng pamumuhay ng mga nawalan ng tirahan, at ang mga kababaihan ay nanganganak sa mga toldang plastik o sa mga pampublikong gusali. At kahit ang mga umaabot sa ospital para doon manganak ay bumabalik sa kanilang mga pansamantalang masisilungan ilang oras lang matapos sumailalim sa Caesarean section.

Upang mabawasan ang panganib na magkasakit o mamatay ang mga ina at ang mga bagong panganak na sanggol, sinusuportahan ng Doctors Without Borders ang postpartum care ng Emirati Hospital sa pamamagitan ng pagdagdag ng 12 na kama sa ward, kung kaya’t ang kapasidad nito’y umabot na sa 20 na kama. Ang mas mataas na kapasidad ay nangangahulugang mas maraming pasyente ang nasusubaybayan nang maayos pagkatapos nilang manganak.

“Kapag ganitong kulang sa supplies at sobra sa pasyente, nasasagad ang sistema ng pangangalagang pangkalusugan. Napipilitan ang mga inang lisanin ang ospital, ilang oras pa lang pagkatapos nilang manganak,” paliwanag ng Doctors Without Borders midwife activity manager na si Rita Botelho da Costa. “Ang unang 24 oras pagkatapos manganak ang pinakakritikal na panahon para sa mga ina, kung kailan malaki ang posibilidad na magkaroon ng kumplikasyon ang pasyente, at dahil ang kondisyon ng kanilang pamumuhay ay napakamiserable, mahalagang hangga’t maaari ay manatili muna ang pasyente sa ospital.”

Dahil sa kakulangan ng paraang makakuha ng maternal health services, marami sa mga nagdadalang-tao ang di nakatanggap ng pangangalaga mula noong nag-umpisa ang digmaan, at wala silang kaalaman tungkol sa kalagayan ng nasa kanilang sinapupunan.

Noong ika-anim na buwan ng kanyang pagbubuntis, ipinasok ang 33 taong gulang na si Rana Abu Hameida sa maternity ward ng Emirati Hospital dahil sa mga kumplikasyong kaugnay ng kanyang pagbubuntis. Mula noong pumutok ang digmaan ay hindi na siya nakapagpa-checkup. Si Abu Hameida ay isa sa mga nawalan ng tirahan sa Beit Lahya, sa hilagang bahagi ng Gaza, at katulad ni Maha, siya ngayo’y nakatira sa isang tolda.

Kapag ang mga nagdadalang-tao ay walang paraan upang makakuha ng pangangalagang pangkalusugan, sapat na pagkain, at maayos na tirahan, sila at ang kanilang mga anak ay malamang na makararanas ng mga suliranin sa kanilang kalusugan, katulad ng mga impeksyon. Ang mga anak ng mga malnourished na nagpapasusong ina ay nanganganib mula sa mga isyung pangkalusugan, at sa pangmatagalan ay maaari rin silang magkaroon ng developmental challenges.

Mahigit 1/3 ng mga pasyenteng humihingi ng pangangalaga bago manganak ay natukoy na may anemia, isang kondisyong kalimitang iniuugnay sa kakulangan ng iron, na kritikal sa kalusugan ng nagdadalang-tao kaya’t sila’y pinapainom ng iron supplements. Dagdag pa rito, halos kalahati sa mga babaeng ito ang may genitourinary infection, gaya ng urinary tract infections.

Sa Rafah, ang mga team ng Doctors Without Borders ay nagbibigay ng pangangalaga sa mga kapapanganak pa lang, at ng suporta para sa kalusugang pangkaisipan sa Emirati Hospital. Sa Al Shaboura Clinic, ang mga nagdadalang-tao ay binibigyan ng pangangalaga bago sila manganak: kasama rito ang screening para sa malnutrisyon, at sila’y binibigyan ng supplementary therapeutic food kung kinakailangan.

Noong unang linggo ng Enero, ang mga gynecologist at obstetrician ng Doctors Without Borders ay nagbigay ng antenatal care sa mahigit 200 na pasyente sa Al Shaboura clinic. Samantala, sa Emirati Hospital naman, sa unang linggo pa lang ng kanilang pinalaking post-natal care ward ay nakatanggap na ang mga team ng Doctors Without Borders ng mahigit sa 170 na pasyente. Ngunit, kung wala pa ring sapat na humanitarian aid na papasok sa Gaza at hindi pa rin mapoprotektahan ang iilang pasilidad pangkalusugang nagagamit pa, hindi malayo ang mararating ng pagbibigay ng pangangalaga.

Muling nananawagan ang Doctors Without Borders para sa isang agaran at walang pasubaling ceasefire, at para sa proteksyon ng mga pasilidad pangkalusugan upang mapangalagaan ang mga buhay ng mga tao. Binibigyang-diin din namin ang kagyat na pangangailangang pahintulutang muli ang pagpasok ng humanitarian aid sa Gaza at ibalik ang sistema para sa pangangalagang pangkalusugan, kung saan nakasalalay ang buhay at kaligtasan ng mga ina at ng kanilang mga anak.