Sa ibang bahagi ng bansa, lalo na sa Khartoum, Darfur, at sa mga estado ng North Kordofan at Gedaref, nahaharap ang mga team ng Doctors Without Borders sa mga seryosong hamon. Ang Doctors Without Borders sa Nyala, South Darfur, ay nilooban at pinagnakawan – pati ang isa naming warehouse. Sa Khartoum, hindi makalabas ang karamihan sa mga team dahil sa tindi ng mga sagupaang nagaganap. Hindi rin sila makapasok sa mga warehouse upang kumuha ng medical supplies para sa ospital. Maging ang mga ambulansya ay hindi pinapadaan, kahit upang makuha mula sa kalsada ang mga bangkay ng mga nasawi, o upang maghatid ng mga nasaktan sa ospital.
Nakipag-ugnayan na kami sa mga Sudanese medical team sa Khartoum at sa ibang bahagi ng bansa kung saan tinatanggap ang mga sugatan. Marami sa kanila ang matagal nang walang pahinga, nagbibigay ng makasagip-buhay na pangangalaga sa gitna ng napakahirap na sitwasyon habang isinasantabi ang posibleng mangyari sa kanila at ang magiging epekto nito sa kanilang mga pamilya.
Handa kaming magbigay ng supplies at magtalaga ng medical personnel sa mahahalagang pasilidad pangkalusugan na nangangailangan ng suporta, ngunit masyadong delikado ang sitwasyon ngaon sa Khartoum at sa ibang mga siyudad. Kahit na mabuksan ang ilang pasilidad, marami ang di makakapunta sa mga ito dahil sa karahasang nagaganap—mangangamba lang sila para sa kanilang kaligtasan.
Pananawagan para sa kaligtasan ng mga sibilyan at mga pasilidad pangkalusugan
Kami sa Doctors Without Borders ay nananawagan para sa kaligtasan ng mga sibilyan: dapat silang protektahan mula sa karahasang tila walang pinipili, walang kinikilala. Inuudyukan namin ang lahat ng sangkot sa alitan na garantiyahan ang kaligtasan ng mga medical staff at mga pasyente, upang makakuha sila ng pangangalagang pangkalusugan nang di nangangamba para sa kanilang buhay. Dagdag pa rito, hinihingi namin sa lahat ng sangkot sa alitan na tiyaking protektado ang lahat ng pasilidad pangkalusugan. Kabilang rito ang mga ospital, klinika, warehouse, at mga ambulansiya. Kailanman, ang mga pasilidad na ito’y di dapat gawing target o pagbuntunan ng karahasan.
Ang Doctors Without Borders sa Sudan ay nagbibigay ng pangangalagang medikal na sumasagip ng mga buhay nang walang kinikilingan. Binibigay namin ang pangangalagang ito sa sinumang nangangailangan, batay lamang sa pangangailangan. Ngunit sa kasalukuyan, hindi kami makagalaw dahil sa tindi ng sagupaan. Muli kaming nakikiusap sa lahat ng sangkot sa nangyayaring karahasan na igalang ang mga medical personnel, pasilidad pangkalusugan, at mga ambulansiya, at pahalagahan sana ang buhay ng mga sibilyan at ng mga humanitarian workers.
