Sa kasalukuyan, ang Cité Soleil Emergency Hospital ng Doctors Without Borders ang tanging pasilidad medikal na nakakapaggamot ng mga pasyente sa lugar pagkatapos magsara kamakailan lang ng Fontaine Hospital, na di konektado sa Doctors Without Borders. Hindi tiyak kung hanggang kailan mananatiling nakasara ang pribadong pasilidad na ito, pagkatapos nilang maipit sa gitna ng mga sagupaan noong Nobyembre 15. Lahat ng mga pasyente at staff ng Fontaine hospital ay inilipat na sa ibang mga ospital sa Port-au-Prince, kung kaya’t nabawasan ng access sa pangangalagang medikal sa Cité Soleil.
Ang mga nagdadalang-tao, pati na rin ang ibang mga pasyente, ay nasa delikadong sitwasyon ngayon. Dati-rati, isinasangguni ng mga team ng Doctors Without Borders na nasa Cité Soleil ang mga nagdadalang- tao sa Fontaine Hospital upang doon manganak. Ang Saint Damiens, isang maternity centre sa Port-au-Prince, ay nagsara na rin noong Oktubre dahil sa kawalan ng seguridad.
Napilitan din ang Doctors Without Borders na pansamantalang isara ang kanilang outpatient clinic,at bawasan ang mga medical team sa Cité Soleil upang malimitahan ang panganib sa staff, mga pasyente at mga istruktura habang nagaganap ang matindi at walang habas na karahasan. Gayunpaman, nananatiling bukas ang Cité Soleil Emergency Hospital upang maghatid ng emergency services.
