Dahil sa sunod-sunod na insidenteng nagdala ng panganib sa mga medical team ng Doctors Without Borders, patuloy nilang tinatasa ang kanilang presensiya at ang kanilang mga ginagawa sa bansa. Ang medical staff, na araw-araw ay nakikipagbuno upang makasagip ng buhay, ay nagugulat pa rin sa pagpapatuloy ng karahasan at sa pang-aalipusta ng mga armadong grupo sa kanila. Samantala, sa ibang bahagi naman ng Port-au-Prince metropolitan area, kinailangan ding pansamantalang isara ng Doctors Without Borders ang ospital sa Drouillard noong Abril 2022. Ang emergency center sa Martissant ay permanente nang isinara noong Hunyo 2021, at sinuspinde ang pagbibigay ng suporta sa Raoul Pierre Louis hospital sa Carrefour mula noong Enero 2023 dahil sa kakulangan ng seguridad.
Muling nanawagan ang Doctors Without Borders sa iba’t ibang grupong sangkot sa mga alitan sa Port-au-Prince na respetuhin ang mga pasilidad medikal, upang maipagpatuloy ang mga gawain dito. Nananatiling determinado ang Doctors Without Borders na manindigan para sa mga mamamayan ng Haiti. Sila ang mga pangunahing biktima ng patuloy na pagkasira ng seguridad sa bansa nitong mga nakalipas na taon. Maliban sa ospital sa Tabarre,ipagpapatuloy ng Doctors Without Borders ang mga programang medikal nito sa Haiti.
Noong 2022, ang mga team ng Doctors Without Borders sa Haiti, sa pakikipagtulungan sa Ministry of Health, ay nagsagawa ng mahigit 4,600 surgeries, 34,200 emergency consultations at 17,800 mobile clinic consultations. Sila rin ay nakapaggamot ng 2,600 na taong nasaktan sa pamamaril, 370 sa pagkasunog, at 2,300 na biktima ng karahasang sekswal. Nagbigay rin sila ng pangangalaga sa 700 na panganganak.
