Palestine: Kinondena ng Doctors Without Borders ang pagsalakay ng mga Israeli sa isang water distribution site sa Gaza City

Sa hapon ng Lunes, Setyembre 15, pinatamaan ng mga puwersang Israeli ang isang water truck na malinaw na pag-aari ng Doctors Without Borders/ Médecins Sans Frontières (MSF) habang ito ay namamahagi ng 10,000 na litro ng inuming tubig sa kapitbahayan ng Sheikh Radwan sa silangang bahagi ng Gaza City. Ang ruta at iskedyul ng sasakyan ay ipinagbigay-alam na sa mga awtoridad na Israeli, na ginagawa ng Doctors Without Borders araw-araw.

Ang pagsalakay na ito ay hindi maaaring ituring lang na isang pagkakamali. Ito ay sinadyang pagsisikap na isabotahe ang pamamahagi ng tubig sa mga sibilyan na hindi maaaring umalis sa lugar, partikular na ang mga pinakamahihirap, may sakit, at ang mga pinakamahihinang tao na nakatira sa mga tolda, o sa mga labi ng mga dati nilang tirahan.

Hanggang noong Setyembre 12, sinusuportahan ng Doctors Without Borders ang emergency room ng isang primary health care center sa Sheikh Radwan. Ito na lang ang natitirang gumaganang istrukturang pangkalusugan na may kapasidad para tumugon sa mga emergency sa lugar na iyon, at nakatatanggap ito ng mga 1,100 na mga emergency patient kada linggo. Dahil sa mga tumitinding operasyong militar sa lugar, nagpasya ang Ministry of Health na subukang ilipat ang klinika sa ibang lokasyon.  Ngunit wala silang mahanap na angkop na lugar, kaya’t ang populasyong naiwan sa kapitbahayan ay wala nang mapagkunan ng serbisyong medikal.