DRC: Naghahanda ang Doctors Without Borders para sa malawakang pagtugon sa outbreak ng Ebola

Noong Mayo 15, kinumpirma rin ng mga awtoridad ng kalusugan sa karatig-bansa ng Uganda ang isang kaso ng Ebola Bundibugyo Virus Disease – isang 59 na taong gulang na lalaking Congolese, na namatay noong Mayo 14. Ipinahayag ng Doctors Without Borders sa Ministry of Health ng Uganda na handa nitong suportahan ang pagtugon ng mga awtoridad ng kalusugang pampubliko.

“Ang bilang ng mga kaso at pagkamatay na ating nasasaksihan sa napakaikling panahon, kasaba y ng paglaganap  ng sakit sa ilang mga health zone at ngayo’y maging sa karatig-bansa, ay lubhang nakababahala,” sabi nI Trish Newport, ang Emergency Programme Manager ng Doctors Without Borders. “Sa Ituri, marami ang nahihirapang makakuha ng pangangalagang pangkalusugan. Nabubuhay sila nang walang seguridad kung kaya’t kailangan ng agarang pagkilos upang mapigilan ang lalong paglala ng outbreak.”

Ang pagtugon ng Doctors Without Borders

Sa kasalukuyan, ang Doctors Without Borders ay may mga team sa mga apektadong bahagi ng Ituri  upang mapag-aralan ang mga pangangailangang medikal, at sila’y nakikipagtulungan sa mga awtoridad ng kalusugan ng DRC. Sa klinika ng Salama ng Doctors Without Borders sa Bunia, mayroong tatlong pinaghihinalaang kaso, at sila ngayo’y nakabukod na.  

Sa kasalukuyan, nagpapadala ang Doctors Without Borders ng mas maraming mga team na kinabibilangan ng mga medical, logistical, at support staff na may karanasan na sa pagtugon sa mga viral haemorrhagic fever outbreak, pati na rin ng kinakailangang supplies, upang maglunsad ng malawakang pagtugon sa lalong madaling panahon. Titiyakin din ng Doctors Without Borders na maipapatupad ang mahihigpit na panukala sa pagpigil ng paglaganap ng mga sakit, upang maprotektahan ang aming mga staff, mga pasyente at ang kanilang mapagkukunan ng pangangalagang pangkalusugan.

Tinatayang ang antas ng mga namamatay dahil sa strain ng Bundibugyo ay nasa pagitan ng 25 at 40%. Ito ang pangatlong natuklasang outbreak na kaugnay ng Bundibugyo strain. Kasunod ito ng mga outbreak sa Uganda noong 2007-2008 at sa DRC noong 2012.

Ano ang Ebola?

Ang Ebola ay isang nakahahawang viral haemorrhagic fever, na naipapasa sa mga tao sa pamamagitan ng direktang paghawak o pagdikit sa dugo, mga secretion, mga organ, o iba pang mga likido mula sa katawan ng mga nahawaang hayop. Ito'y naipapasa sa pagitan ng mga tao sa pamamagitan ng paghawak o pagdikit sa mga likido mula sa katawan ng mga nahawaang indibidwal.

Nitong mga nakaraang taon, tumugon na ang Doctors Without Borders sa ilang mga Ebola outbreak sa DRC. Ang outbreak na ito ay ang ika-17 na sa bansa mula noong natuklasan ang unang kaso ng sakit na ito noong 1976.