Babala ng Doctors Without Borders: Hindi nagagawa ng mga pamahalaan ang kinakailangang pagsusuri, paggamot at pagpigil ng TB sa mga bata

Ang under-diagnosis ng TB sa mga bata ay nauwi sa under-treatment at mataas na bilang ng mga namamatay. Ang mga diagnostic test na para sa mga nakatatanda na may TB ay hindi magagamit sa mga bata, dahil hindi sapat ang pagkasensitibo nito upang matukoy ang mga mababang antas ng TB bacteria na sanhi ng sakit ng mga bata. Ang resulta nito ay kahit na sa mga lugar na may mga mapagkukunang-yaman, posible lang na makumpirma ang pagkakaroon ng TB sa kaunting mga bata. 

Bagama’t ang sputum o plema ay ang mas pinipiling specimen na gagamitin para sa pagtukoy ng TB sa mga nakatatanda, karamihan sa mga bata ay hindi kayang dumahak kung kinakailangan. Inirekomenda ngayon ng WHO na ang mga bata ay suriin sa pamamagitan ng gastric, naso-pharingeal o mga stool sample gamit ang GeneXpert Ultra test. Ang pagkuha ng mga gastric fluid sample mula sa mga bata ay maaaring isang invasive na proseso at kadalasa’y hindi posible o mapanghamon sa mga maliliit o di kaya’y may sakit na mga bata. Kaya naman ang stool testing lang ang magagawa sa maraming lugar, kahit na hindi ito praktikal, lalo na para sa mga outpatient.

Sa kawalan ng mga wasto at accessible na mga diagnostic test upang matukoy ang TB sa mga bata, kinakailangang tiyakin ng mga health provider ang maagang diagnosis batay sa mga sintomas, na siyang inirerekomenda rin ng WHO. May kagyat na pangangailangan para sa mas maraming pagsasaliksik upang makahanap ng mas mainam na test para gamitin sa mga bata.

“Isang palaisipan na itong nakamamatay, ngunit kayang gamutin, na sakit ay ilang libong taon nang nasa mundo, pero ngayong ikadalawampu’t isang siglo, 40% lang ng mga batang may TB ang nakakuha ng paggamot na kinakailangan nila para manatiling buhay, dahil walang mga tamang instrumento para matukoy ang TB sa mga bata,” sabi ni Dr. Nasiba Maksumova, na nagtatrabaho para sa TB project ng Doctors Without Borders sa Tajikistan.  

Bukod sa testing at paggamot, ang implementasyon ng preventive treatment sa mga bata at mga adolescent na may nakasalamuhang mga taong may TB sa kanilang pamilya o sa komunidad ay isang malaking hamon. Ang mas maikling rehimen, na tumatagal lang ng tatlong buwan, ay matagal nang inirerekomenda para sa mga bata, ngunit ang kanilang mga ginagawa ay hindi pa rin sapat. Kinakailangang dagdagan ng mga bansa ang access sa mga preventive treatment at simulan ang paggamot ng mga batang nangangailangan upang mapigilan ang ka-nilang pagkakaroon ng active TB.  

“Matapos ang ilang dekada ng paghihintay, sa wakas ay mayroon na tayong mga child-friendly formulation ng mga gamot para sa TB,” sabi ni Dr. Kennedy Uadiale, na nagtatrabaho para sa proyekto ng MSF sa Sierra Leone. “Ngunit kakaunti pa ring mga bata ang nabibigyan ng preventive TB drugs dahil ang proseso ng pagkilala sa kanila ay matrabaho. Panahon na para isakatuparan ng mga bansa ang mga pangakong binitawan nila sa UN Political Declaration on TB noong nakaraang buwan at sagipin ang buhay ng mga batang apektado ng TB.”