Noong simula ng Nobyembre ay nagsagawa ang Doctors Without Borders ng anim na retrospective mortality surveys sa iba’t ibang bahagi ng mga refugee settlement sa Cox’s Bazar sa Bangladesh, malapit sa hangganan ng Myanmar. Ang kabuuang populasyon ng mga lugar kung saan ginawa ang mga survey ay 608,108; 503,698 sa kanila ang tumakas mula sa Myanmar pagkatapos ng ika-25 ng Agosto.
Ang kabuuang mortality rate ng mga taong nasa mga kabahayan na kasama sa survey sa pagitan ng ika-25 ng Agosto at ika-24 ng Setyembre ay 8.0/10,000 tao kada araw. Katumbas ito ng pagkamatay ng 2.26% (sa pagitan ng 1.87% at 2.73%) ng sampled population. Kung ang pagtitimbang na ito ay gagamitin sa kabuuang populasyon na dumating mula ika-25 ng Agosto sa mga kampo na sakop ng mga survey, mahihinuha na 9,425 hanggang 13,759 na Rohingya ang namatay tatlumpu’t isang araw matapos magsimula ang karahasan. Kabilang sa mga namatay ang hindi bababa sa 1,000 bata na wala pang limang taong gulang.
Pinapakita ng mga survey na hindi bababa sa 71.7% ang namatay dahil sa karahasan, kahit ang mga batang wala pang limang taong gulang. Kabilang dito ang mga 6,700 na tao, kasama ang 730 na bata. Pamamaril ang dahilan ng pagkamatay ng 69% ng mga kamatayang kaugnay ng karahasan, kasunod nito ay ang pagkasunog habang sila’y nasa loob ng kanilang mga tahanan (9%), at mayroon ding mga namatay dahil sa pambubugbog (5%). Sa mga batang wala pang limang taong gulang, mahigit 59% ng pinatay ay iniulat na binaril, 15% ang nasunog sa kanilang mga tahanan, 7% ang namatay dahil sa pambubugbog at 2% ang namatay dahil sa pagsabog ng mga landmine.
