Ang mga pamamahagi ng pagkain na pinatatakbo ng GHF ay mga planadong pagpatay at dehumanisasyon—kailangang ipasara ang mga ito

Ang International Committee of the Red Cross ay nag-alerto ukol sa biglang pagtaas ng mga insidente ng maramihang pagpatay sa mga food distribution site nang ang Red Cross Field Hospital sa Rafah ay nakatanggap ng 132 na mga pasyenteng nagtamo ng pinsala dahil sa mga sandata. 25 sa mga ito ay patay na noong dumating sa ospital at anim naman ang namatay pagkatapos silang tanggapin sa pasilidad. Ang field hospital na ito ay nakapaggamot ng mahigit 3,400 na nasugatan ng mga sandata at nakapagtala ng mahigit sa 250 na mga nasawi.

Ayon sa isang detalyadong pagsusuri ng mga pasyenteng nagtamo ng pinsala mula sa pamamaril na nagpagamot sa klinika sa Al Mawasi ng Doctors Without Borders, 11% ng mga bala ay tumama sa ulo o leeg, samantalang 19% naman ang tumama sa dibdib, sa tiyan, o sa likod. Ang mga pag-uulit at katumpakan ng mga bahaging pinatatamaan ng mga namamaril ay maaaring pagpapatunay na ang mga tao sa loob at paligid ng mga distribution site ay sinadyang puntiryahin at hindi sila mga biktima lang ng mga aksidente o ng walang pinipiling pamamaril para sa tinatawag na “crowd control” (pagkontrol sa kaguluhan ng mga tao).  

Walang ibang paraan upang ilarawan ang pagpatay sa mga bata kundi na ito’y sinadya. Sa kabila ng mga pagkondena at mga panawagan na buwagin na ito, ang hindi pagkilos ng mundo upang pigilan ang GHF ay isang malaking palaisipan.

Ang karahasan ng mga tao sa mga pamamahagi ng GHF ay isa pang kahila-hilakbot na karanasan. Ang mga taong kumukuha ng aid ay madalas na binubugbog o ninanakawan ng pagkain ng ibang nakakasama nila sa mga gitgitan. Kaya naman, ang mga kasamahan ko’y gumawa ng isang bagong registry code: ang BBO o Beaten by Others (Sinaktan ng Iba).

Upang maharap ang pagdami ng pasyente nitong mga nakaraang linggo, pinalaki namin ang maliliit na mga emergency room at naglaan ng isang kama para lamang sa mga namatay na pasyente. Ang sistema para sa pangangalagang pangkalusugan sa Gaza ay naghihingalo na dahil sa walang humpay na hidwaan at ngayon nama’y malawakang karahasan sa mga aid site.

Ang pangangalaga sa mga sugat sa aming klinika sa Al Mawasi ay umakyat ng 206% sa apat na linggo mula noong nag-umpisang tumakbo ang GHF. Ang nakokonsumong supplies sa loob lamang ng isang linggo ay dapat para sa isang buwan na. Kumukuha kami ng mga supply ng mga body bag tuwing dalawang linggo dahil sa dami ng karahasang nangyayari sa mga site ng GHF. 

Ang mga team ng Doctors Without Borders mula sa iba’t ibang bahagi ng mundo ay nananawagan para sa agarang pagtigil ng pamamaraan ng pamamahagi ng GHF dahil ito ay napatunayang nakamamatay, nakapagpapababa ng dignidad, mapanganib at hindi makatutulong.  

Hinihingi namin ang pagwawakas ng pagkubkob ng Israel sa Gaza at ang pagbukas ng lahat ng hangganang tatawiran sa lupa upang mapahintulutan ang mabilis, ligtas at walang sagabal na pagpasok ng mga produktong pangkalakalan at ng humanitarian aid, at ng pagpapadali ng mga relief operation ng mga walang kinikilingan at propesyonal na ahensyang humanitarian. Ito ay upang maiabot ang pagtulong sa mga pinakamahihinang tao, saan man sila sa Gaza – tulad ng hinihingi ng pandaigdigang batas humanitarian sa mga mananakop na may kapangyarihan.  

Hinihingi rin namin ang pagtiyak ng pagpasok ng mga pagkain sa Gaza na sapat ang dami at sa sapat na bilis sa mga humanitarian at commercial na daan — upang labanan ang lumalalang pagkagutom. Ang napakalaking pagdami ng mga lifesaving supply na papasok sa Gaza ay makababawas sa kasalukuyang bigat na pinapasan ng aid convoy.