Banta ng Israel na pagtanggi sa pagpaparehistro ng mga NGO, isang matinding dagok sa humanitarian aid sa Gaza at sa West Bank

Ang pagkait ng tulong medikal sa mga sibilyan ay hindi katanggap-tanggap sa anumang sitwasyon at kasuklam-suklam kapag ginagamit ang humanitarian aid bilang kasangkapan ng mga patakaran o ng kolektibong pagpaparusa. Panahon na para kumilos. Pinaiigting ng Israel ang pagsalakay nito sa pagtugong humanitarian, at tuwirang binabantaan ang pangangalagang medikal at humanitarian aid para sa mga sibilyan. 

Tahasang sinasalungat ng Doctors Without Borders ang mga alegasyon ng mga awtoridad na Israeli nitong mga nakaraang araw. Hindi kailanman magpapatrabaho ang Doctors Without Borders sa kahit sinong indibidwal na sangkot sa mga aktibidad ng militar, na taliwas sa aming mga pinahahalagahan at etika. Kung ang mga paglalarawan ng aming mga team ng kanilang mga nasaksihan sa Gaza – kamatayan, pagkawasak at ang mga kahihinatnan ng karahasan laban sa lahi – ay maaaring hindi masisikmura ng iba, ngunit ang dapat sisihin ay ang mga gumagawa ng mga karumal-dumal na krimeng ito, at hindi ang mga naglalahad lamang ukol dito. 

Ang Doctors Without Borders ay may mga lehitimong ikinababahala ukol sa hinihingi sa pagpaparehistro na personal na impormasyon ng aming mga staff na Palestino na dapat naming ibahagi sa mga awtoridad na Israeli, lalo pa’t 15 sa aming mga kasamahan sa Doctors Without Borders ay pinatay ng mga puwersang Israeli. Sa kahit anong konteksto – lalo na sa isang sitwasyon kung saan ang mga medical at humanitarian worker ay sinindak, ikinulong nang walang dahilan, sinalakay, at pinagpapapatay nang maramihan – ang paghingi ng mga listahan ng staff bilang kondisyon para mabigyan ng access sa isang lugar ay isang kalabisan. Pinahihina nito ang kalayaan at pagkawalang-panig ng mga makataong adhikain, at ito’y lalong ginagawang mapanganib dahil sa kawalan ng anumang linaw kung paano gagamitin, iimbakin, o ibabahagi ang ganito kasensitibong impormasyon. Subali’t, sa halip na pakinggan ang aming mga inaalala, ang Ministry na nangangasiwa ng proseso ng pagpaparehistro ay isinasawalang-bahala ang aming paulit-ulit na hiling na makipagpulong at inakusahan pa kami sa media ng pagkakanlong ng mga pinaghihinalaang terorista. 

Pinatay at sinugatan ng mga puwersang Israeli ang daan-daang libong mga sibilyan, sinadyang wasakin ang mga mahahalagang imprastraktura, at pinuntirya ang mga medical staff, mga humanitarian at mga mamamahayag. Kontrolado na nila ang mahigit sa kalahati ng Gaza Strip, pinuwersa nila ang populasyon sa paliit nang paliit na mga lugar na may mga hindi makataong kondisyon, at minaniobra ang kakulangan ng mga pangunahing pangangailangan sa pamamagitan ng paghadlang at pagpaliban ng pagpasok ng mga mahahalagang kagamitan, tulad ng medical supplies.