Limang bagay na dapat mong malaman ukol sa pagkagutom sa Gaza

Higit sa kalahati ng mga pasyenteng kasama sa aming programa para sa malnutrisyon sa Gaza City ay mga nagdadalang tao at nagpapasusong mga kababaihan. Ang pagiging malnourished habang nagdadalang tao ay maaaring magdala ng panganib ng mga kumplikasyong tulad ng maagang panganganak.

Nitong nakaraang apat na linggo, tumaas ang bilang ng mga taong ginagamot sa klinika namin sa Gaza City.  Sa bawat isa sa apat na linggong iyon, tumaas ito ng 9%, 17%, 10%, at 10%. Isang suliranin para sa amin ang pagpapahintulot sa mga pasyenteng lumabas nang walang sapat na gamot at pagkain, habang patuloy na dumarami ang mga pasyente.

Sa aming klinika sa Gaza City, 21% ang itinaas ng bilang ng mga sanggol na edad 6 hanggang 23 na buwan na ginagamot para sa malubhang malnutrisyon noong nakaraang linggo lamang, kumpara sa naunang linggo. 

Malnutrisyon sa Gaza: Mga Mahahalagang Bilang*

• Kada linggo, mahigit 1,000 na tao ang sumasailalim sa screening sa aming mga klinika sa Khan Younis at Gaza City, at ang global acute malnutrition rate ay nasa 20%.
• Halos isa sa kada limang batang sumailalim sa screening sa mga klinikang ito ay may banayad o malubhang malnutrisyon—na lumalampas sa emergency threshold na 15%.
• Ang bilang ng mga sanggol edad 6 hangang 23 na buwan na ginagamot para sa malubhang malnutrisyon ay umakyat ng 2% nitong nakaraang linggo lamang.
• 90% ng mga pasyente sa klinika sa Gaza City ay mga sanggol na 6 hanggang 23 na buwan— ang edad na walang kalaban-laban sa malnutrisyon.
• Ang mga nagdadalang tao at nagpapasusong kababaihan ay mahigit sa kalahati ng mga pasyenteng kasali sa aming programa para sa malnutrisyon sa Gaza City.

*Ang mga bilang na ito ay hango mula sa mga aktibidad ng Doctors Without Borders sa aming mga klinika sa Gaza City at Khan Younis at hindi sumasalamin sa buong sitwasyon ng krisis ng malnutrisyon sa Strip.

Ang malnutrisyon ay hindi lang kakulangan sa pagkain—ito rin ay isang nakamamatay na kondisyong medikal.

Kahit na dumating ang maraming food supplies sa Gaza sa mga darating na linggo, magpapatuloy pa rin ang krisis. Ang agarang makukuhang paggamot—kabilang rito ang mga therapeutic food gaya ng Plumpy’Nut—ay magiging mahalaga para sumagip ng mga buhay.

Ang laki ng aming mga medikal na aktibidad ay lubhang napipigilan ng kakulangan ng mga supply dahil sa paghadlang ng mga awtoridad na Israeli sa aid. Sa North Gaza, lalong tumitindi ang mga hamon dahil sa limitadong presensya ng mga organisasyong humanitarian, hirap ng pagpasok ng mga therapeutic food sa Gaza City, pagkawasak ng mga pasilidad pangkalusugan, at kakulangan ng mga pisikal na istruktura na maaaring gamitin sa pagbibigay ng pangangalagang pangkalusugan.

Iilan lamang ang mga pasilidad na may kakayahang harapin ang mga malubhang kumplikadong kaso sa buong Gaza. Kapag nagpatuloy ang pagdami ng mga kaso ng malnutrisyon, malamang ay aakyat din ang pangangailangan sa inpatient care. Sa kasalukuyan, may mga 15 na kama sa timog para sa inpatient treatment ng malnutrisyon at 20 naman ang nasa Gaza city.

Ang kakulangan sa pagkain na aming nasasaksihan sa Gaza ay nangangahulugang hindi namin mapakain ang mga pasyente sa mga ospital, at kahit aming mga staff ay ilang araw nang walang kinakain.

Ang staff ng Doctors Without Borders ay napipilitang magrasyon ng pagkain at kadalasa’y kumakain lang ng isang beses sa isang araw.

Ang mga community kitchen na nagbibigay ng pagkain para sa mga staff at mga pasyente ay nagsusumikap upang makapagbigay ng pagkain sa ilang mga pasilidad kung saan kami nagtatrabaho. Kahit may pagkain, ito naman ay lubhang limitado at kulang na kulang sa mga sustansyang kailangan ng mga pasyente upang gumaling o bumuti ang kanilang kalagayan.

Noong simula pa lang ng GHF aid scheme, nasaksihan namin ang madalas na malawakang pagpatay kung saan pinagbababaril ng mga puwersang Israeli ang mga desperado at gutom na tao sa mga distribution site.

Araw-araw, inilalagay ng mga tao sa panganib ang kanilang mga buhay upang makakuha ng pagkain. Araw-araw din ang maramihang pagpatay sa pagpasok ng mga trak sa Strip. Isa sa aming mga kasamahan ay binaril sa isa sa mga insidenteng iyon. Ang pagkagutom na gawa ng mga awtoridad na Israeli, na sinamahan ng paiba-ibang pagpasok ng aid na pinahintulutan sa Gaza ay nagdulot ng kaguluhan. Noong Hulyo 30, may mga 600 na taong nasugatan at mahigit sa 50 ang napatay dahil sa pamamaril, pagkaipit, at mga pagsaksak.

Sa dalawang klinika ng Doctors Without Borders sa timog na bahagi ng Gaza, ang Al-Mawasi at Al-Attar primary healthcare clinic, ang mga team ng Doctors Without Borders ay tumanggap ng mahigit sa 1,300 na biktima ng karahasan. Kabilang rito ang 28 na napatay sa pagitan ng Hunyo 7 at Hulyo 24. Ang lahat, maliban sa isa sa mga nasawi, ay nagtamo ng pinsala dahil sa pamamaril.

Ang malnutrisyon ay nakaaapekto sa kakayahan ng mga taong gumaling mula sa mga pinsalang nagdudulot ng trauma

Ang mga pasyenteng may trauma ay kasalukuyang nakatatanggap ng wala pa sa kalahati ng kinakailangan nilang calories. Ang matinding pagkasunog, halimbawa, ay nangangailangan ng humigit-kumulang 3,000 na calories kada araw upang gumaling nang husto.

Ang kakulangan ng tamang nutrisyon ay maaaring magresulta sa malubhang kumplikasyong medikal gaya ng impeksyon, pagkaantala ng paggaling, at madalas ay sa pangangailangang putulin ang isang bahagi ng katawan.