Isang lumalalang krisis
Sa mga lugar ng alitan tulad ng Afghanistan, Yemen, Nigeria, at South Sudan, ang malnutrisyon ay di lang isang isyung humanitarian —ito’y isa ring karera, kung saan oras ang kalaban. Para sa di mabilang na mga bata, ito ay nangangahulugan ng buhay o kamatayan. Kaya naman, pinagsisikapan ng Doctors Without Borders na paunlarin ang sitwasyon.
Ang malnutrisyon ay hindi lang pagkagutom—ito ay posibleng banta sa buhay, dahil sa kakulangan ng sustansiya. Sa mga lugar kung saan ang mga pamilya ay nakikipagbuno na sa digmaan, mga pagbaha, at sa pagbagsak ng ekonomiya, mabilis na lumalala ang krisis.
Pinakahuling ulat
Ang mga team ng Doctors Without Borders na nasa iba’t ibang bahagi ng Northern Nigeria ay nag-uulat ng nakababahalang pagdami ng tinatanggap na mga batang nagdurusa dahil sa severe acute malnutrition—ilang linggo pa bago magsimula ang panahon ng tagsalat. Noong Abril lamang, ang bilang ng mga batang tinanggap sa Kebbi State ay 40% ang itinaas kumpara sa bilang noong ganoon ding panahon nitong nakaraang taon. Sa Kano, ang kapasidad ng aming mga inpatient therapeutic feeding centre ay sagad na o malapit nang masagad. Noong 2024, tumanggap ang Doctors Without Borders ng mahigit sa 250,000 na bata sa mga outpatient feeding programme at gumamot sa ospital ng 76,000 na mga bata para sa malnutrisyong may mga kasamang kumplikasyon—isang malubhang pagtaas mula sa nakaraang taon. Ang tinatantiya para sa 2025 ay mas lalong malagim: mahigit 33 na milyong Nigerian ang inaasahang haharap sa matataas na antas ng acute food insecurity kapag panahon na ng tagsalat.
Mga ulat tungkol sa malnutritsyon
Pandaigdigang sitwasyon
- 295 na milyong tao sa 53 na bansa ang humarap sa acute food insecurity noong 2024, ang ika-anim sa magkakasunod na taon ng lumalalang pagkagutom.
- 1.9 na milyong tao ang nakararanas ng catastrophic hunger (IPC Phase 5), ang pinakamataas na naitalang bilang mula noong nagsimula ang pagsubaybay rito.
- 38 na milyong batang wala pang limang taong gulang ang acutely malnourished sa 26 na bansa noong 2024.
Malnutrisyon ng mga bata
- 150.2 na milyong batang wala pang limang taong gulang ay stunted (masyadong maliit para sa kanilang edad) noong 2024.
- 42.8 na milyong batang wala pang limang taong gulang ay wasted (masyadong payat para sa kanilang taas) noong 2024.
- 12.2 na milyong batang wala pang limang taong gulang ay nagdusa mula sa severe wasting noong 2024.
- 35.5 na milyong batang wala pang limang taong gulang ay sobra sa timbang noong 2024.
Kahirapan sa pagkain ng mga bata
- 181 na milyong batang wala pang limang taong gulang ay nakararanas ng kahirapan sa pagkain, at ang kanilang kinokonsumo araw-araw ay galing lamang sa dalawa o mas kaunti pang food group.
- Sa South Asia at sub-Saharan Africa mahahanap ang mahigit sa dalawang sangkatlo ng mga batang nakararanas ng matinding kahirapan sa pagkain.
Bakit dumarami ang mga kaso ng malnutrisyon?
- Winawasak ng mga alitan at ng pagkawala ng mga tirahan ang mga sistema para sa pagkain.
- Ang mga sakunang hatid ng klima gaya ng pagbaha at tagtuyot ay nakapipinsala sa mga ani.
- Ang kawalan ng katatagan ng ekonomiya ay nagiging sanhi ng pagtaas ng presyo ng mga pagkain.
- Ang mga resulta ng pandemyang dulot ng COVID-19 ay patuloy na nagpapahina sa mga dati nang nanganganib na mga ekonomiya at sistema para sa pangangalagang pangkalusugan.
- Sa maraming mga lugar, ang hindi masustansiyang pagkain ay mas mura at mas madaling makuha kaysa masustansiyang pagkain.
Napakaraming mga sanhi ng krisis na ito. Ang kombinasyon ng pagtaas ng presyo ng mga pagkain, pagkawala ng mga tirahan, kawalan ng seguridad, mga pagkabigo sa pag-ani dahil sa klima, ang mababang bilang ng mga nababakunahan, at ang kakulangan ng maiinom na tubig at ng sanitasyon ay nag-iiwan sa mga bata sa bingit ng malnutrisyon. Dapat ipagpatuloy ng lahat, pati ng MSF, ang pagbuo ng mga mapapanatiling estratehiya upang mapagaan ang mga epekto ng mga salik na ito. Sa ilang taon naming pagtugon sa isyung ito, alam kong hindi sapat na solusyon ang pagpopondo para sa pagkain. Ngunit kung wala ito, patuloy ang pagpanaw ng mga batang Nigerian.Dr. Simba Tirima, Nigeria Country Rep.
- Yemen
- Nananatili ang Yemen bilang isa sa mga bansang may pinakamalalang krisis na humanitarian. Milyon-milyon sa kanila ang nananatiling walang tirahan, at halos kalahati ng populasyon ay nahaharap sa kawalan ng seguridad sa pagkain. Ang limitadong mapagkukunan ng pangangalagang pangkalusugan, malinis na tubig, at ng pagkain ay naglalagay sa mga bata at mga ina sa matinding panganib.
- Ang sistema ng pangangalagang pangkalusugan ay malapit nang gumuho. 46% ng mga pasilidad ay may mga bahagi na lang na gumagana o kaya’y tuluyan nang nagsara. Ang pagbawas sa aid—kasama ang pagdesisyon ng US na itigil ang pagsuporta sa bansa noong Abril 2025—ay nakaaapekto sa mahigit 520 na mga pasilidad pangkalusugan at sa hindi bababa sa 20 na organisasyon.
- Ginamot ng Doctors Without Borders ang mahigit 35,000 na malnourished na bata na wala pang limang taong gulang sa mga governorate ng Amran, Saada, Hajjah, Taiz, at Al Hudaydah mula 2022 hanggang 2024.
- Umabot ang bed occupancy rate ng Abs Hospital ITFC sa 200% noong Setyembre 2024; habang ang Al Salam Hospital sa Khamer naman ay umabot sa 254% noong Oktubre.
- Dalawang sangkatlo ng mga nagdadalang tao at nagpapasusong mga kababaihang tinanggap sa mga pasilidad ng Doctors Without Borders ay malnourished.
- Sa paghinto ng pagbibigay ng aid, itinatayang may 100,000 na bata ang hindi na makatatanggap ng pangangalagang nutrisyonal at 2.4 milyong tao ang mapagkakaitan ng food assistance.
- Muling nagkaroon ng mga outbreak ng mga mapipigilang sakit gaya ng tigdas at diphtheria dahil sa mahihirap na kondisyon ng pamumuhay at dahil kaunti ang nababakunahan.
- Malaki ang inaasahan mula sa Doctors Without Borders upang punan ang mga kakulangang idinulot ng pag-alis ng mga pandaigdigang katuwang. Nananawagan kami sa mga donor na palakihin ang kanilang ibinibigay na suporta sa lalong madaling panahon, at sa mga awtoridad na paunlarin ang access sa pangangalagang pangkalusugan at magpatupad ng mga epektibong kampanya sa pagbabakuna.
- Ang mga parusa at ang pagtatalaga sa Ansar Allah bilang FTO ay nakadadagdag sa paghihirap dahil sa paggambala nito sa pag-angkat ng pagkain, mga gamot, at iba pang mahahalagang produkto.
- Tinutuligsa rin ng Doctors Without Borders ang mga pagsalakay kamakailan lang sa mga imprastrukturang sibilyan ng Yemen. Kabilang rito ang mga airstrike sa mga ospital, mga pantalan, at mga power station, na lubos na nakahadlang sa pagkuha ng aid at pangangalagang medikal.
- Nigeria
- Mahigit sa 328,000 na bata ang ginamot para sa malnutrisyon noong 2024—24% ang itinaas mula noong 2023. Karamihan sa mga kaso ay nasa mga estado sa hilaga.
- Sinusuportahan ng Doctors Without Borders ang 10 na inpatient therapeutic feeding centre at 36 na ambulatory centre sa iba’t ibang bahagi ng bansa, at nagbibigay ng mahahalagang pangangalaga para sa mga pinakanangangailangan.
- Noong Marso pa lang ay nagsimula nang dumami ang mga kaso ng malnutrisyon, ilang buwan bago ang Hulyo, ang karaniwang panahon ng kasagsagan nito.
- Sa Kebbi, dumami ang mga tinanggap na pasyente ng mahigit sa 40% noong Abril 2025 kumpara sa nakaraang taon; sa Kano, ang mga pangunahing ITFC ay sagad na sa kanilang kapasidad, at marami pang mga sentro ang inaasahang mapupuspos.
- Madagascar
- Sa Southeast Madagascar, partikular na sa distrito ng Ikongo, tumutugon ang Doctors Without Borders sa pagdami ng mga kaso ng malnutrisyon sanhi ng kakulangan ng pagkain at ng mga nangyaring sakuna dahil sa klima.
- Pagdating ng Enero 2023, 2,072 na bata na wala pang limang taong gulang ang ginagamot para sa severe acute malnutrition sa limang sentrong pangkalusugan—halos kalahati sa kanila ay kasali sa mga programa ng Doctors Without Borders.
- Nahaharap ang rehiyon sa mga natural na kalamidad, kabilang rito ang mga bagyong Batsirai at Emnati noong 2022, na sumira sa mahigit kalahati ng mga lokal na pananim kung kaya’t nawalan ng kita ang mga pamilyang nagsasaka.
- Mahigit 25% ang mga tao sa Vatovavy-Fitovinany at Atsimo-Atsinanana ay namumuhay nang may acute food insecurity.
- Sinusuportahan ng Doctors Without Borders ang 24 na mga pasilidad pangkalusugan sa mga lugar na mahirap marating at pinalalaki ang mga aktibidad upang matugunan ang dumaraming pangangailangan sa harap ng limitadong presensyang humanitarian.
- Somalia
- Ang Doctors Without Borders ay nagpapatakbo ng 20 na mobile nutrition clinic at 32 na monitoring site sa Baidoa, isa sa mga lugar na pinakanaaapektuhan ng kasalukuyang tagtuyot.
- Mahigit 206,000 na bata ang sumailalim sa screening para sa malnutrisyon noong 2022, at libo-libo sa kanila ang nangailangan ng emergency nutritional care.
- Sa pagitan ng Enero at Agosto 2022, mahigit 12,000 na bata ang ginamot para sa acute malnutrition, at kada linggo ay tumatanggap ang pasilidad ng humigit-kumulang 500 na pasyente.
- Nananatiling kritikal ang sitwasyon. Ang tagtuyot na nangyayari sa iba’t ibang panahon, pagkawala ng mga tirahan, at ang limitadong mapagkukunan ng pangangalagang pangkalusugan ay nagpapahina sa pagkakataon ng mga batang mabuhay.
- Ethiopia
- Nakasasaksi ang Doctors Without Borders ng malubhang krisis ng nutrisyon sa Afar, kung saan ang malnutrisyon ng mga batang wala pang limang taong gulang ay tumindi kasunod ng alitan, tagtuyot, at pagkasira ng mga lokal na serbisyo para sa pangangalagang pangkalusugan.
- Sa Dupti Hospital, ang tanging gumaganang referral facility sa rehiyon, ang bilang ng mga tinatanggap na batang pasyente na may malalang malnutrisyon ay umakyat ng tatlo hanggang apat na beses kumpara sa nakaraang mga taon.
- Marami sa mga bata ang dumarating na nasa kritikal nang kondisyon, at may ilang linggo kung kailan ang mga namamatay sa kanila ay higit sa 20% ng kanilang kabuuang bilang. Dalawang sangkatlo ng mga tinanggap na pasyente ay mula sa mga pamilyang nawalan ng tirahan at walang pinagkukunan ng pangangalagang pangkalusugan.
- Nakababahala na mahigit 80% ng mga malnourished na batang aming tinanggap ay hindi pa nakatanggap ng paggamot at kadalasa’y namamatay sa loob ng 48 na oras matapos silang tanggapin.
- Bilang pagtugon, pinalawak ng Doctors Without Borders ang pagsuporta nito sa Dupti Hospital. Kabilang sa suportang ito ang pagbibigay ng 14 na kama, ang pagpapatatag ng mga serbisyo para sa mga emergency, at ang paglulunsad ng mga plano para sa mga bagong outpatient feeding programme sa mga pinakanapinsalang lugar.
- Ang mga istrukturang pangkalusugan na napinsala o kulang sa mapagkukunang-yaman ay mga pangunahing balakid. 20% lang ng mga pasilidad pangkalusugan sa Afar ang gumagana pa rin.
- Isang hamon din ang pagkuha ng malinis na tubig. Sa isang insidente, 41 na bata ang dinala sa amin sa loob ng dalawang araw. Lahat sila’y may matinding impeksyon sa tiyan na nakuha nila sa pag-inom ng maputik na tubig.
- Kenya
- Ang Marsabit County ay lubhang naapektuhan ng sunod-sunod na pagkabigo ng pag-ulan, na nagdulot ng kawalan ng seguridad sa pagkain at ng malnutrisyon, partikular na sa mga sub-county ng Illeret at North Horr.
- Noong Pebrero 2022, nakita sa isang maramihang screening na isinagawa ng UNICEF sa Marsabit na may 23% global acute malnutrition rate sa lugar. Napakataas nito kung ikukumpara sa mga emergency threshold.
- Sa pagitan ng Pebrero at Marso 2022, 11 na batang kasali sa programa ng Doctors Without Borders para sa malnutrisyon ay namatay dahil sa mga kumplikasyon kaugnay ng severe acute malnutrition.
- Dahil sa mga hamong lohistiko at kakulangan ng staff, madalang na kaming makapagsagawa ng mga outreach clinic – isa o dalawang beses lang sa isang buwan. Dahil dito, kulang sa follow-up ang mga pasyente at naaantala ang kanilang paggamot.
- Sa pakikipagtulungan sa Ministry of Health, pinalalakas ng Doctors Without Borders ang inpatient department ng Illeret Health Centre upang tumakbo ito bilang isang therapeutic feeding centre na may 10 na kama habang pinauunlad ang mga referral system at screening upang matukoy ang mga kaso nang mas maaga.
- Ang mga ina ng mga malnourished na batang nasa loob ng pasilidad ay nakatatanggap din ng pagkain araw-araw upang mapabuti ang kanilang paggagatas at nutrisyon bilang isang ina.
- South Sudan
- Mula ngayon hanggang Hulyo 2025, tinatayang mahigit pitong milyong tao sa South Sudan ang haharap sa acute food insecurity.
- Sa Leer, Unity State, ang Doctors Without Borders ay saksi sa isang delikadong pagtatagpo ng malnutrisyon at ng isang sakit na matagal na. Ang mga pasyenteng may TB/HIV ay partikular na naaapektuhan, dahil ang mga side effect ng gamot ay hindi na kakayanin kung walang kinain.
- May ilang mga pasyenteng binabawasan o hindi itinutuloy ang paggamot upang maiwasan ang matinding sakit, kahit na ang maaaring maging resulta nito ay hindi na sila tatalaban ng gamot at maaari rin nila itong ikamatay.
- Ang Doctors Without Borders ay may mahigit sa 600 na pasyenteng may TB/HIV sa Leer lamang. Nitong mga nakaraang buwan, ang bagong pasyente kada buwan ay dumoble, mula 8 ay naging 16.
- Tumataas ang defaulter rate habang ang mga pasyente ay hindi na makasunod sa hinihingi ng paggamot dahil sa gutom. Kinokompromiso rin ng malnutrisyon ang immunity ng isang tao at ginagawa siyang mas madaling kapitan ng sakit.
- Mula Abril 2023, mahigit 60,000 na returnee at refugee ang dumating mula sa Sudan, na lubhang nakapupuspos sa mga sistema ng pagkain at pangangalagang pangkalusugan.
- Ang pamamahagi ng pagkain ay nananatiling hindi sapat at hindi prioridad. Walang mekanismong susuporta sa mga mahihinang grupo gaya ng mga pasyenteng may TB/HIV.
- Afghanistan
- Ang mga team ng Doctors Without Borders ay nagtatrabaho sa Kandahar, Helmand, Herat, Kabul, at Khost, kung saan sila’y tumutugon sa malawakang malnutrisyon ng mga batang wala pang limang taong gulang at mga nagpapagatas na mga ina.
- Noong 2023, ang mga pasilidad na sinusuportahan ng Doctors Without Borders ay tumanggap ng mahigit 10,400 na bata na wala pang limang taong gulang sa mga inpatient malnutrition programme sa Herat, Lashkar Gah, at Kandahar. Mula Enero hanggang Abril 2024, 2,416 na mga pasyente ang tinanggap—isang 5% na pagtaas mula sa nakaraang taon.
- Mahigit 6,900 na bata ang isinali sa mga ambulatory therapeutic feeding centre (ATFC) noong 2023.
- Marami sa mga kaso ang sanhi ng kawalan ng seguridad sa pagkain dahil sa kahirapan at hindi sapat na pagpapasuso. Kadalasan, ang mga sanggol ay nagkakasakit matapos silang uminom ng infant formula.
- Sa mga pasilidad ng Doctors Without Borders ay maraming sanggol na kadalasa’y wala pang isang taong gulang. Ito’y indikasyon ng mga isyu ukol sa pagpapasuso at sa kakulangan ng makukuhang early nutrition support.
- Sa ilang mga inpatient facility, dalawang bata at ang kanilang mga ina ay magkakatabi sa iisang kama dahil sa kakulangan ng higaan.
- Ang mga pasyente ay bumibiyahe ng ilang oras mula sa mga probinsya gaya ng Badghis upang makakuha ng pangangalaga, na nagbibigay-diin sa puwang sa pagkuha ng mga lokal na serbisyong pangkalusugan.
- Tumutugon ang Doctors Without Borders sa pamamagitan ng inpatient at outpatient care, pati na rin sa pamamagitan ng mga aktibidad na nagtataguyod ng kalusugan at naglalayong pabutihin ang mga kasanayan sa pagpapasuso at sa complementary feeding.
Ano ang ginagawa ng Doctors Without Borders upang solusyonan ang malnutrisyon?
Tumutugon ang Doctors Without Borders sa isyu ng malnutrisyon sa ilang mga bansa, gaya ng Afghanistan, Yemen, Nigeria, South Sudan at Madagascar.
Sa marami sa aming proyekto, tumutugon din kami sa indibidwal na mga kaso ng malnutrisyon.
Kaunting kaalaman ukol sa malnutrisyon
Isinasagawa ng Doctors Without Borders ang screening ng isang komunidad para sa potensyal na mga kaso ng malnutrisyon sa pamamagitan ng nutritional assessments, at ito’y aming ginagawa kasabay ng aming mga outpatient at inpatient services na di naman nakatuon lamang sa nutrisyon, at pati na rin sa mga ibang interbensyon. Tinatasa ng aming mga team ang mga bata as pamamagitan ng pagkukumpara sa ratio ng kanilang timbang-para sa- taas sa pandaigdigang pamantayan ng WHO at/o sa pamamagitan ng pagsukat ng mid-upper-arm circumference (MUAC) ng bata, gamit ang mga colour-coded paper bracelets. At dahil simple lang ang paggamit ng sukat ng MUAC, maaari rin itong gamitin sa mga barangay ng mga community health worker.
Ang malawakang paggamit ng ready-to-use therapeutic food (RUTF), na naglalaman ng partikular na binalanseng sustansiya ay nakakatulong sa ating paglaban sa malnutrisyon. Ito ay maaaring imbakin nang matagal nang hindi kinakailangang ipasok sa refrigerator. Ang RUTF ay maaaring parang peanut butter ang anyo, o puwede rin itong parang biskwit. Sa tulong nito, ang paggamot ay gagawin lang ng pamilya sa kanilang tahanan, at pagkatapos ay kukuha ng follow-up appointment sa klinika. Ang cure rate o bisa nito ay mahigit sa 90 porsiyento, at makababawas pa sa mga aalagaang inpatient.
Sa ilang mga rehiyon, ang aming mga team ay nagpapatakbo ng mga proyekto para maiwasan ang malnutrisyon at pigilang magkasakit ang mga bata,lalo na pagkatapos ng taunang “hunger gap”. Nagsisimula nang magrabaho ang Doctors Without Borders at nagsasaayos ng mga outpatient clinic ilang buwan bago ang tag-ulan , kung kailan dumadami ang mga kaso ng malnutrisyon. Sa mga lugar kung saan malamang ay magiging malala ang malnutrisyon, gumagamit ang aming mga team ng stratehiya kung saan hahadlangan na nila ito bago pa man ito mangyari. Ginagawa nila ito sa pamamagitan ng pamamahagi ng masustansyang supplement sa mga batang nanganganib sa Africa at Asia. Tinitiyak din nila na ang ibang mga pamamaraan upang mapigilan ang paglaganap ng sakit, gaya ng pagbabakuna at malaria chemoprophylaxis, ay ipinapatupad.