Gaza: Dose-dosenang Palestino, minasaker sa mga food distribution site na sinusuportahan ng US at Israel

Ang mga team ng Doctors Without Borders / Médecins Sans Frontières (MSF) ay tumulong sa mass casualty response sa Nasser Hospital sa Khan Younis. Inilahad ng mga pasyente sa Doctors Without Borders na sila’y sinalakay mula sa iba’t ibang direksyon ng mga drone, mga helicopter, mga bangkang de-motor, mga tangke, at mga sundalong Israeli. 

“Muling ipinapakita ng mga kaganapan ngayong araw na ito na ang bagong sistema ng paghahatid ng aid ay hindi makatao, delikado at lubhang di epektibo. Naging sanhi ito ng pagkamatay at nagdulot sa mga sibilyan ng mga pinsalang maaari naman sanang maiwasan. Ang humanitarian aid ay dapat ibinibigay lamang ng mga organisasyong humanitarian na may kakayahan at determinasyong gawin iyon sa ligtas at epektibong paraan,” sabi ni Claire Manera, ang emergency coordinator ng Doctors Without Borders. 

Sa Nasser Hospital ngayong araw na ito, ang mga team ng Doctors Without Borders ay may mga ginamot na mga pasyenteng nagtamo ng malalang pinsala. May ilang mga pasyenteng nasa kritikal na kondisyon at sumasailalim pa sa mga operasyon. Ngunit dahil ang mga blood bank ay halos wala nang laman, ang medical staff mismo ang nagbibigay ng dugo bilang donasyon.

“Ang mga pasilyo ng ospital ay punong-puno ng mga pasyente. Ngunit hindi tulad ng nasaksihan ko dati, kung saan karamihan sa mga pasyente ay kababaihan at mga bata, ngayon nama’y panay lalaki. Nakahiga sila sa mga kama na nasa pasilyo na dahil ang mga silid ay punong-puno na ng mga taong nasaktan. Kitang-kita ang tama ng bala sa kanilang mga binti, at ang kanilang mga kasuotan ay basang-basa ng dugo,” sabi ni Nour Alsaqa, communications officer ng Doctors Without Borders. 

“Tila pinanghinaan sila ng loob pagkatapos nilang sumubok makakuha ng pagkain para sa kanilang mga anak. Umuwi silang luhaan at nasaktan pa sila sa labanan. Dinig na dinig ang sigawan ng mga tao sa labas, mga sirena, at ang walang patid na pagdating ng mga pasyente sa emergency room. Sa gitna ng kaguluhan, nakumpirma namin na ang kapatid ng isa sa aming kasamahan ay napatay habang sinusubukan niyang makakuha ng aid mula sa distribution centre,” dagdag niya.