Ang opensa ng Gaza City ay isang hatol ng kamatayan para sa isang milyong Palestino

Nasa sukdulan na ang sistemang pangkalusugan

Sadyang winawasak ng opensang Israel ang kapasidad ng Gaza para sa pangangalagang pangkalusugan. Mahigit sa kalahati ng mga ospital ang hindi na magagamit; ang mga naiwang gumagana ay nasa bingit ng ganap na pagkasira dahil sa mga nakapuntiryang pagsalakay. Ang mga bed occupancy rate ay umaabot ng 300% sa Al Ahli Hospital, 240% sa Shifa Hospital, at 210% sa Rantissi Hospital. Ang kasalukuyang pagtindi ng karahasan sa Gaza City ay nagbabantang magpasara sa 11 sa 18 na bahagyang gumaganang mga ospital sa Gaza Strip pati na rin ang ibang mga pasilidad para sa pangangalagang pangkalusugan, habang ang mga awtoridad sa kalusugan ay nag-uulat na nauubusan na ng stock ng mahigit sa kalahati ng mga mahahalagang gamot.

Tiniis ng medical staff ang mga paulit-ulit na pagsalakay, ang mga health worker ay pinapatay, kinukulong o pinagbabantaan, kabilang rito ang isang doktor mula sa Doctors Without Borders na nakakulong pa rin kahit na walang pormal na kasong isinasampa laban sa kanya. Sa mga pasilidad medikal na sinusuportahan namin sa Gaza City, dumarami ang mga pasyenteng may mga seryosong pinsala. Ang mga pasyenteng nangangailangan ng intensive care ay maaaring mamatay kapag sila ay sapilitang pinalikas dahil sa pagsasara ng mga ospital. Ang mga taong may kapansanan, may mga sakit o sugatan ay hindi makakalikas.

Ang pagkagutom bilang patakaran 

Ang pagkubkob ay naging sanhi ng taggutom: ang mga paghihigpit sa pagkuha ng pagkain, malinis na tubig, at ng gamot, at sa paghahatid ng aid ay dahilan upang pumailanlang ang acute malnutrition rate. Ang mga sibilyang desperadong makakuha ng aid ay humaharap sa mga nakamamatay na puwersa sa mga distribution point. Ilang buwan nang tumutugon ang mga klinika ng Doctors Without Borders sa maraming mga naging biktima ng karahasan ng mga Israeli sa mga food distribution site na pinangangasiwaan ng GHF.
 

Kailangan nang tigilan ang mga operasyong panlupa 

Layunin ng mga puwersang Israeli na mapaalis ang mga Palestino mula sa Gaza City sa pamamagitan ng pagpatay ng lahi, ethnic cleansing at mga imposibleng kondisyon ng pamumuhay. Walang ligtas na lugar, at ang kulang na kulang na aid ay idinadaan sa mga rutang lubhang mapanganib para sa mga sibilyan. Patuloy rin ang sinasadyang pagwasak ng mga kritikal na imprastruktura.

Hinihingi ng Doctors Without Borders ang agarang pagwakas ng paggamit ng mga kautusang lumikas para sa puwersahang pagpapaalis, isang mapapanatiling ceasefire, at ang pagpasok ng humanitarian aid na sapat ang laki at dami. Humihingi kami ng proteksyon para sa mga pasilidad medikal at ng pagtutulungan ng mga iba’t ibang kumikilos para sa mga layuning humanitarian. Ang sistematikong pagwasak sa isang buong lungsod at sa populasyon nito ay dapat nang wakasan. Nananawagan din kami sa mga kaalyado ng Israel na tigilan na ang paghahatid ng mga armas sa Israel at patindihin ang pangggigipit upang mapigilan ang kanilang opensa. Kung walang magaganap na kagyat at radikal na interbensyon, nahaharap ang Gaza sa ganap na paglipol.