Pagkubkob sa Gaza: Tinutuligsa ng Doctors Without Borders ang sinadyang trahedyang humanitarian

Ang mga paghadlang sa humanitarian aid ay isang tuwirang paglabag sa UN Security Council Resolution 2720, na humihingi ng hindi hahadlangang paghahatid ng humanitarian aid sa mga sibilyan. Ang mga akusasyon na ang aid ay ipinahahatid ng Hamas sa ibang lugar ay hindi napatunayan at hindi nito nabibigyang-katwiran ang ginagawa nilang paghadlang. Bilang mananakop, dapat padaliin ng Israel ang pagbibigay ng walang kinikilingang humanitarian assistance para sa populasyong nangangailangan. 

Ang UN, mga EU member state, at lahat ng mga may impluwensiya sa Israel ay dapat gamitin agad ang kanilang pampulitika at pang-ekonomiyang puwersa upang tigilan ang paggamit sa aid bilang instrumento para makamit ang kanilang mga layunin. Ang humanitarian supplies, pagkain, gasolina, at mga gamot ay dapat nang pahintulutang maihatid sa populasyon ng Gaza ngayon. 

Mula noong sinimulan muli ng Israel ang mga pagsalakay at ang ganap na pagbangkulong sa aid noong Marso 2, ang Gaza ay naging mistulang impiyerno sa mundo ng mga Palestino. Ang buhay ng mga Palestino ay nakasalalay sa awa ng mga awwtoridad na Israeli, na nagkakait sa buong populasyon ng pagkain, tubig, pangangalagang medikal, at ng matitirhan. ipinagpapatuloy ng Israel ang kampanya nila para sa ethnic cleansing sa pamamagitan ng sinasadyang pagwasak ng mga kondisyong kinakailangan upang mabuhay.

Ang mga organisasyong tulad ng World Central Kitchen at ang World Food Programme (WFP) ay nagpahayag na wala na silang mga nakaimbak na pagkain sa Gaza: karamihan sa mga community kitchen at mga panaderya ay nagsara na. Ang mga medical team ng Doctors Without Borders sa Gaza City ay nakakita ng 32% na pagtaas sa bilang ng mga pasyenteng may malnutrisyon nitong nakaraang dalawang linggo. 

Dahil sa pakaunti nang pakaunting stock ng gasolina ay nalilimitahan ang kakayahan para sa desalination at pamamahagi ng tubig. Ang mga pasilidad pangkalusugan na gumagana pa – na hindi sapat ang bilang at ang kapasidad ng bawat isa – ay patuloy na sinasalakay at nagdurusa sa mabilis na pag-ubos ng mga stock ng gamot at iba pang mahahalagang supplies. Ang mga team ng Doctors Without Borders sa Gaza ay 11 na linggo nang hindi nakatatanggap ng supplies at nahaharap sa kritikal na kakulangan ng mga mahahalagang medical item gaya ng mga sterile compress at sterile na guwantes.

Sa kasalukuyan, ang mga kautusan ng Israel sa paglikas at ang kanilang mga itinalagang no-go military zone ay sumasakop na sa 70% ng Gaza. Ang mga tao ay sapilitang inilipat sa iba’t ibang lugar, habang sinasalakay ang lahat ng bahagi ng Gaza. Ang mga pasyenteng kakagamot lang ng mga team ng Doctors Without Borders ay bumabalik nang may mga bagong natamong pinsala—ganito na kadesperado ang sitwasyon. 

Ang plano ng mga Israeli na gamitin bilang instrumento ang aid ay isang mapagkutyang pagtugon sa nilikha nilang krisis na humanitarian. Kung gugustuhin nila, maaaring tanggalin ng Israel at ng kanilang mga kaalyado ang pagkakabangkulong ng Gaza ngayon, at hayaang makarating ang humanitarian aid sa mga taong umaasa doon upang mabuhay.