Gaza: Napag-alaman sa survey ng Doctors Without Borders staff at ng kanilang mga pamilya na ang halos kalahati ng mga taong napatay ay mga bata

Ang pagwawalang-bahala sa mga buhay ng mga bata ay isang malinaw na indikasyon na ang pakikidigmang ito ng mga Israeli sa Gaza ay pakikipaglaban sa lahat ng mga Palestino. Ang mga bata sa Gaza ay pinupuksa,” sabi ni Amande Bazerolle, deputy manager sa emergency department ng Doctors Without Borders. “Ang mga kaalyado ng Israel ay kinakailangang magsumikap na wakasan ang genocide na nagaganap sa mismong harapan namin,” sabi niya.

Napag-alaman sa survey ng Doctors Without Borders na ang mortality rate sa Gaza ay 0.41 ang namamatay kada 10,000 na tao sa bawat araw. Umaakyat ito sa 0.70 na namamatay para sa mga batang wala pang limang taong gulang. 20% ng kabahayan ng mga taga-Doctors Without Borders ay mayroong isang miyembro o higit pa na nagtamo ng pinsala dahil sa pagsabog o pamamaril. 

Ang mga resulta ng survey na isinagawa sa mga Doctors Without Borders staff at sa kanilang mga pamilya lamang, ay hindi maaaring ituring bilang kumakatawan sa buong populasyon ng Gaza. Ang mga medical staff at ang kanilang mga pamilya, kasama ang Doctors Without Borders, ay maaaring mas nakakakuha ng pangangalagang pangkalusugan kaysa ibang mga miyembro ng populasyon ng Gaza. 

Sa kabila nito, ang bilang ng mga namamatay na hindi tuwirang maiuugnay sa mga pinsalang tinamo dahil sa digmaan ay umaakyat habang nagpapatuloy ang digmaan, ayon sa mga obserbasyon sa pag-aaral. Napag-alaman na dalawang-katlo sa mga dati nang may sakit ay nakaranas ng isa o higit pang pagkaantala ng paggamot.

Ito ang resulta ng kampanya ng mga Israeli na sistematikong wasakin ang sistemang pangkalusugan at ang mga paraan upang mabuhay ang buong populasyon.

Dagdag pa rito, binawasan ng Israel ang mga paglikas dahil sa mga medikal na kondisyon. Ayon sa WHO, mahigit sa sampung libong tao ang may kagyat na pangangailangan para sa paggamot at mga surgical procedure na hindi makukuha sa Gaza.  

Mula noong Oktubre 7, 2023 hanggang noong Hunyo 25, 2025, nag-ulat ang  Ministry of Health ng Gaza tungkol sa pagpatay ng hindi bababa sa 56,156 na mga Palestino at ng pananakit ng 132,239 na tao. 

Ang mga datos mula sa pag-aaral ng Doctors Without Borders ay nakatutulong sa paglalarawan ng bahagi ng totoong nangyayari sa Gaza at sa pagsuporta sa ibang mga datos, isang puntong binibigyang-diin ng study coordinator mula sa Epicentre na si Dr. Wendelin Moser.  

“Noong ikinumpara namin ang mga pangalan ng mga namatay na indibidwal dahil sa karahasan mula sa aming survey sa listahan ng mga kamatayang kaugnay ng digmaan mula sa Ministry of Health ng Gaza, halos 90% ng mga listahan ay magkapareho. Ito’y indikasyon ng pagkatotoo ng mga istatistika ukol sa bilang ng mga namamatay sa Gaza mula pa noong Oktubre 7,” sabi niya.

Nagbibigay rin ang survey ng malinaw na datos ukol sa antas ng pagkawasak ng mga kabahayan ng mga taga-Doctors Without Borders. 2% lang ang may bahay na hindi naapektuhan. Noong ginawa ang survey, 59% ang may ganap na nawasak na bahay, 39% ay may mga bahagi ng kanilang bahay na napinsala, at 41% ang nakatira na ngayon sa mga tolda.  

[Basahin ngayon: Pagpapaliwanag ukol sa retrospective mortality survey ng Doctors Without Borders sa aming mga staff at sa kanilang mga pamilya sa Gaza]

Nananawagan ang Doctors Without Borders sa mga awtoridad na Israeli na tigilan na ang kampanya nito sa maramihang pagpatay ng mga Palestino sa Gaza; wakasan na ang pagkubkob sa pagkain, gasolina, medical at humanitarian supplies sa lalong madaling panahon; at hinihiling rin namin ang mga kaalyado ng Israel na tulungan kaming mapadali ang mga kagyat na paglilikas ng mga taong nanganganib ang buhay, partikular na ang mga bata.