“Ang pagdulot ng pinsala at ang pagkait ng pangangalaga” sa West Bank: Iniulat ng Doctors Without Borders ang pagtindi ng mga pagsalakay at paghadlang sa pangangalagang pangkalusugan

"Ang mga pasyenteng Palestino ay namamatay dahil di sila makarating sa mga ospital," sabi ni Brice de le Vingne, ang Doctors Without Borders Emergency Coordinator. "Nakakakita kami ng mga ambulansyang hinaharangan ng mga puwersang Israeli sa mga checkpoint habang may mga lulan itong pasyenteng nasa kritikal na kondisyon, mga pasilidad medikal na napapaligiran at nilolooban, at mga healthcare worker na nakararanas ng karahasang pisikal habang nagsusumikap silang sumagip ng mga buhay.”

Ang pagdami ng mga pagsalakay sa mga medical personnel at sa mga pasilidad ay iniulat sa mga team ng Doctors Without Borders. Kabilang rito ang mga pagsalakay sa mga ospital, pagkawasak ng pansamantalang medical site sa mga refugee camp, pati na rin ang panliligalig, pagkulong, pagbibigay-pinsala, at pagpatay sa mga first responder at ng mga medical worker ng mga puwersang Israeli. 

Sa pagitan ng Oktubre 2023 at Disyembre 2024, ang WHO ay nagtala ng 694 na pagsalakay sa pangangalagang pangkulusugan sa West Bank, kung saan ang mga ospital at istruktura para sa pangangalagang pangkalusugan ay kadalasang kinukubkob ng mga puwersang militar. Ang mga healthcare worker ay nagpapahayag ng pakiramdam ng kawalan ng seguridad dahil madalas silang nililigalig, kinukulong, sinasaktan, at pinapatay.

“Pinaligiran ng mga puwersang Israeli ang stabilisation point [sa Tubas], at isinara ang dalawang pasukan nito, kahit na malinaw naman na ito’y isang gusaling medikal. Inutusan nila ang lahat ng mga paramedic na lumabas mula sa stabilisation point.  Mga 22 kaming mga paramedic na naroon,” sabi ng isang medic ng Palestinian Red Crescent Society, na sinusuportahan ng Doctors Without Borders.

Sa mga kaso ng medical emergency, ang paghihigpit sa paggalaw ay maaaring mauwi sa nakamamatay na kahihinatnan.  Sa ganitong konteksto, ang pagkuha ng pangangalagang pangkalusugan ay lubhang naantala dahil sa mga paghahadlang at pagtutok sa mga paggalaw ng mga ambulansya at pagtindi ng mga marahas na pagsalakay ng mga militar. Ang mga ito’y nagdulot ng mga pinsala, kamatayan at pagkasira ng mga mahahalagang imprastrukturang sibilyan, gaya ng mga kalsada, pangangalagang pangkalusugan, mga linya ng tubo para sa tubig at mga sistema ng kuryente, partikular na sa mga refugee camp ng Tulkarem at Jenin. Sa mga liblib na lugar at sa labas ng mga siyudad gaya ng Jenin o Nablus, ang sitwasyon ay kahila-hilakbot. Ang mga pasyenteng may talamak na kondisyon, gaya ng mga nangangailangan ng regular na dialysis treatment, ay napipilitang manatili sa kanilang mga tahanan dahil sa mga hindi malampasang hadlang sa pagkuha ng pangangalagang pangkalusugan.

Bukod sa madalas na pagsalakay ng mga militar na Israeli, ang karahasan ng mga dayo at ang patuloy na paglaki ng kanilang mga pamayanan ay nag-iiwan sa maraming Palestino na nanganganib mula sa karahasan at natatakot na lumipat sa ibang bahagi ng West Bank. Sa kabuuan, 1,500 na pagsalakay ng mga dayong Israeli sa mga Palestino ang iniulat ng OCHA sa pagitan ng Oktubre 2023 at 2024.

Bilang umookupang may kapangyarihan, may mga legal na obligasyon ang Israel sa ilalim ng pandaigdigang batas upang tiyakin ang access sa pangangalagang pangkalusugan at maprotektahan ang mga medical personnel. Ang sistema ng pangangalagang pangkalusugan sa West Bank ay lubos na nahihirapan at nasa palagiang estado ng emergency. 

Nananawagan ang Doctors Without Borders sa Israel na tigilan ang karahasan laban sa mga healthcare worker, mga pasyente at mga pasilidad pangkalusugan at tantanan na rin ang paghadlang sa mga medical personnel sa pagtupad sa mga makasagip-buhay na tungkulin.