South Sudan: Pagkatapos ng 31 na taon, napilitan ang Doctors Without Borders na isara ang Lankien Hospital

Ang pagwasak ng aming ospital sa Lankien ay hindi isang bukod-tanging pangyayari. Ito’y bahagi ng mas malawak at lubhang nakababahalang paglaganap ng karahasan laban sa pangangalagang pangkalusugan sa South Sudan. Mula pa noong umpisa ng taong 2025, ang mga pasilidad at staff ng Doctors Without Borders ay naapektuhan na ng hindi bababa sa 12 na pagsalakay at mga insidente  ng karahasan. Ang mga paulit-ulit  na pangyayaring ito ay naging sanhi ng napilitang pagsara ng apat na ospital — ang Ulang, Old Fangak, Akobo, at ngayon, ang Lankien — at nag-iwan sa daan-daang libong mga tao na walang mapagkukunan ng pangangalagang medikal. Tulad ng madalas mangyari, ang mga tao ang nagdurusa dahil sa mga pagsalakay sa pangangalagang pangkalusugan. 

“Ang mga pagsalakay sa mga medikal na pasilidad, mga healthcare worker, at mga sibilyan ay hindi katanggap-tanggap at dapat nang itigil,” sabi ni Badshah. “Dapat akuin ng mga puwersa ng pamahalaan, ng oposisyon, pati na rin ng iba pang mga armadong grupo, ang responsibilidad para sa kanilang mga pagkilos. Dapat din nilang pigilan ang pagsalakay sa mga medical personnel at mga pasilidad, at sa mga sibilyan. Dapat din nilang respetuhin ang pandaigdigang batas na humanitarian at ang mga prinsipyo nito, kabilang ang mga prinsipyo ng pagkakakilanlan at proposyonalidad,” dagdag ni Badshah. 

Nananawagan ang Doctors Without Borders sa mga awtoridad ng South Sudan na magbigay ng mga malinaw na paliwanag, tiyaking may mananagot sa mga nangyari, at gumawa ng mga konkretong hakbang upang protektahan ang pangangalagang pangkalusugan at mga pagkilos na humanitarian. 

Ang mg aktibidad ng Doctors Without Borders sa Lankien 

Mula 1995 ay nagtatrabaho na ang MSF sa Lankien-- noong una, sa pagtugon sa kala azar, isang napabayaang tropical disease. Sa pagdaan ng mga taon, lumawak ang sakop ng aming mga aktibidad, at ang ospital ay naging natatanging advanced level healthcare facility sa rehiyon. Bago ito nawasak, may humigit-kumulang 250,000 na taong umaasa sa ospital para sa makasagip-buhay na pangangalaga. Sa permanenteng pagsara nito, ang mga komunidad sa rehiyon ay naiwang walang makuhang mga serbisyong medikal, at nalalantad sa mga kamatayang maaari namang mapigilan.