Ethnic cleansing sa West Bank: Ang buhay sa gitnang araw-araw na karahasan at paulit-ulit na demolisyon sa Masafer Yatta

Ayon sa ulat ng mga team ng Doctors Without Borders na bumisita sa Khallet Athaba’, ang mga kagyat na pangangailangan ng komunidad ay pangangalagang  medikal, suporta para sa kalusugang pangkaisipan, mga hygiene item, pagkain, at mga serbisyong kaugnay ng tubig at sanitasyon. Higit sa lahat, binibigyang-diin ng mga pamilya ang pangangailangan nilang maprotektahan, mapanatili ang kanilang dignidad, at mabigyan ng access sa mga mahahalagang serbisyo.

Naghahatid ang Doctors Without Borders ng pangunahing pangangalagang pangkalusugan, suporta para sa kalusugang pangkaisipan, at psychosocial support sa pamamagitan ng mga pinatatakbo nitong mga mobile clinic sa limang barangay sa loob at sa paligid ng Masafer Yatta.

Ikinuwento sa aming mga team ng isang residente na isang buwan pa lang ang nakalilipas mula noong sapilitang pumasok ang siyam na dayo sa kanyang bahay. Siya lang ang kasama ng apat niyang anak noong mga oras na iyon. Pinaghahampas ng mga dayo ang mga bata ng mga bakal na pamalo, at pinagtangkaang hatawin ang ulo ng kanyang tatlong buwan pa lamang na sanggol. Binugahan siya at ang kanyang sanggol ng pepper spray, at habang sinisikap niyang maprotektahan ang kanyang anak, patuloy pa rin ang paghampas sa kanya hanggang sa nabalian siya ng buto sa kamay. Ang isa niyang anak na 13 na taong gulang ay nabalian ng braso samantalang ang isa pa, na tatlong taon pa lang ay nagtamo ng pinsala sa ulo at nabalian din ng buto. Ang sanggol ay isinugod sa ospital, at inoobserbahan pa dahil sa walang tigil na pagsuka.

Ang mga nagaganap sa Masafer Yatta ay bahagi ng isang mas malawak na patakaran ng ethnic cleansing, na naglalayong sapilitang paalisin ang mga Palestino mula sa lugar na ito. Ngunit sa kabila ng mga paulit-ulit na demolisyon at pagsalakay, wala pa ring umaalis sa kanila. Giit ng mga residente, hindi sila papayag na maging refugee sa kanilang sariling bayan.