Ang aming mga team ay namamahagi ng mga kagamitang tulad ng mga kutson at mga hygiene kit sa mga shelter sa iba’t ibang bahagi ng bansa, at ang aming mga mobile medical unit ay nagbibigay ng pangunahing pangangalagang pangkalusugan at pangangalaga para sa kalusugang pangkaisipan sa mga nangangailangan nito. Dagdag pa rito, nagpapatakbo kami ng mga mental health helpline, upang makapagbigay ng suportang sikolohikal sa mga nawalan ng tirahan at iba pang mga apektado sa ganitong panahon ng pagkaligalig.
Patuloy kaming nakikipag-ugnayan sa aming mga katuwang at sa mga network ng ospital, kasama ang pangakong tutulong kami kung saan kami maaaring magbigay-suporta.
Simula kahapon, nilisan ng ilan sa aming mga staff sa South Lebanon, sa Beirut, at sa ibang mga bahagi ng bansa ang kanilang mga tirahan. Ang ilan sa kanila ay ilang oras na naipit sa trapik sa kanilang paghahanap ng ligtas na lugar. Sa South Lebanon at sa Baalbek-Hermel, mga lugar na patuloy pa ring nakararanas ng matitinding aerial strike, ang mga staff ng Doctors Without Borders ay nag-ulat ng pagbobomba malapit sa kanilang mga tirahan. Marami sa mga staff namin ay nasa mga bahay nila noong gabing iyon, at abot-tanaw nila ang patuloy na paglipad ng mga eroplanong pandigmaan ng mga Israeli sa himpapawid, sa buong magdamag.
