Southern Lebanon: Kamatayan, pinsala at malaking pagkawasak pagkatapos ng airstrike ng Israel sa Sour (Tyre)

Malaki ang pagkawasak na idinulot ng airstrike sa Jabal Amel Hospital. Kabilang sa mga napinsala ang inpatient department, radiology department at ang intensive care unit. Ang isang dingding ng operating room ay napuruhan, at ngayo’y isang malaking butas na lamang. Kinailangan ng medical team na agad ilipat ang kalahati ng mga pasyenteng naiwan sa intensive care unit sa ibang ward upang matiyak ang kanilang kaligtasan.

Isang araw bago iyon, ang kalapit na Hiram Hospital – na isa ring pasilidad na sinusuportahan ng Doctors Without Borders – ay tinamaan din ng isang airstrike ng mga Israeli. Ayon sa Lebanese Health Ministry, 13 na mga healthcare worker ang nasaktan. Ang mga insidenteng ito’y naganap sa gitna ng lumalalang karahasan nitong mga nakaraang araw. Kasabay ito ng muling pagpapasailalim ng mga southern suburb ng Beirut sa mga kautusan sa paglikas na inilabas ng Israel noong Lunes, kasunod ng malawakang kautusan sa paglikas na inilabas naman noong Linggo para sa buong katimugan, hanggang sa Zahrani River.

“Ang mga paulit-ulit na pagsalakay ay nagpapakita ng pagkabigong protektahan ang misyong medikal at nagbibigay-diin sa kagyat na pangangailangang mapangalagaan ang kapakanan ng mga sibilyan, medical staff, at mga pasilidad pangkalusugan, at na maipagpatuloy ang pagbibigay ng makasagip-buhay na pangangalaga,” sabi ni Omar Ebeid, ang Project Coordinator ng Doctors Without Borders sa Southern Lebanon.