Ang mga kababaihan ng Darfur, Sudan, ay humihingi ng proteksyon, pangangalaga at katarungan habang patuloy ang karahasang sekswal sa buong rehiyon.

Ang karahasang sekswal ay naging palatandaan na ng hidwaan sa Sudan. Ang laki ng pinsalang naidulot sa mga sibilyan sa Darfur ay mahirap unawain, ngunit patuloy itong nagaganap sa isang mahabang kasaysayan ng paulit-ulit na mga siklo ng karahasan at kalupitan. Sa kasalukuyang konteksto, matindi ang epekto ng karahasang sekswal. Ito’y nag-iiwan ng mga malalim na sugat na ilang dekadang dinadala ng mga indibidwal, mga pamilya at mga komunidad. Ang mga nakaligtas mula sa karahasang sekswal ay kadalasang napipilitang pasanin ang bigat ng kanilang pinagdaanang trauma nang tahimik at nag-iisa, sa isang kontekstong nagbibigay ng kakaunting proteksyon at mas lalong kaunting pananagutan. 

Ang mga ulat ng karahasang sekswal sa Darfur ay lalong lumilitaw sa mga panahon ng matinding labanan, madalas ay isang uri ng sama-samang parusang batay sa etnisidad, at bahagi ng mas malawak na mga kalupitang ipinapataw sa mga sibilyan. Ngunit sa anino ng hidwaan, patuloy na nahaharap ang mga kababaihan sa karahasang sekswal bilang pangkaraniwan at hindi matatakasang realidad kahit matapos man ang mga labanan: sa mga kalsada, sa mga palengke, sa mga bukirin, sa kanilang mga bahay at habang sila’y pinaaalis sa kanilang mga tirahan. Ito’y sumasalamin sa isang kapaligirang hinubog ng maraming taon ng mga hidwaan, kasama ang malalim at sistemikong hindi pagkakapantay-pantay ng mga kasarian, na nagbunga ng hindi napaparusahang mga salarin na kumikilos nang walang pangamba sa kahihinatnan.  

Sa kabila ng laki at pagkalala ng krisis, kakaunti lamang ang mga inisyatiba upang maprotektahan ang mga survivor, masuportahan ang kanilang pagbangon o mapigilan ang karagdagang pang-aabuso. Ang sistemang humanitarian ay nabigo sa pagtugon sa mga pangangailangan ng mga survivor. Ang mga armadong salaring hindi sibilyan ang nagpataw ng pang-aabuso, habang ang mga survivor ay naiiwang walang proteksyon, hindi nakakuha ng katarungan, o ng makabuluhang suporta. Sa kabila ng matitinding panganib at malalaking hadlang, maraming mga  survivor ang naglalakas-loob na kumuha ng pangangalagang medikal at magbahagi ng kanilang mga kuwento – isang patunay ng kanilang katatagan sa kabila ng isang kontekstong dinisenyo upang sila’y patahimikin.