Mga kubong lubog sa tubig-baha sa isang barangay malapit sa Khipro, Sanghar, sa probinsiya ng Sindh. Pakistan, November 2022. © Asim Hafeez for MSF
Sa mga lugar kung saan kami kumikilos, hindi pa rin bumababa ang tubig, kaya’t marami pa rin ang mga emergency medical at humanitarian needs. Kailangang-kailangan ng mga tao ng pagkain, ligtas na inuming tubig, pangangalagang pangkalusugan at masisilungan. Nasa emergency phase pa rin tayo.Edward Taylor, Emergency Coordinator
Ang mga Doctors Without Borders emergency team ay nagpapatakbo ng mga mobile clinic at mga malaria team na bibisita sa mahigit 50 na lugar kada linggo sa mga distrito ng Dadu, Jacobabad, at Shahadat Kot ng Sindh at sa mga distrito ng Jaffarabad, Naseerabad, Sohbatpur, Jhal Magsi, at Usta Mohammed sa silangang Balochistan. Nakapagbigay na kami ng pangunahing pangalagang medikal para sa 92,000 na tao. Karamihan sa mga ito’y may sakit sa balat, malaria, impeksiyon sa respiratory tract, o di kaya’y diarrhoea.
Pagbabalik sa mga nawasak na tirahan at mga kontaminadong mapagkukunan ng tubig
Ang mga bumabalik sa kanilang mga tirahan ay sinasalubong ng mga wasak na bahay at lupain, na napapaligiran pa rin ng tubig na hindi dumadaloy. Ang nakapanlulumong pagkawala ng kanilang mga tahanan at ari-arian ay nakakaapekto sa kalusugang pangkaisipan ng mga tao, at pati na rin sa kanilang kabuhayan. Ang mga Doctors Without Borders team ay nagbibigay ng psychological first aid at mga group counselling session upang masuportahan ang mga tao sa hirap na pinagdadaanan nila.
Samantala, hinaharap naman ng mga naiwan sa mga kampo at mga informal shelter ang papalapit na banta ng tagalamig. Patuloy ang Doctors Without Borders sa pag-aangkop ng mga pinamamahaging non-food items para sa panahon, gaya ng karagdagang kumot ngayong tag-lamig. Nitong nakaraang dalawang linggo, 6,000 na kabahayan ang nakatanggap ng relief package.
Nagsasagawa ang nars ng Doctors Without Borders ng rapid malaria test sa kanyang panganay na babae. Ang aming mga mobile clinic team ay nakagamot na ng mahigit sa 9,500 na pasyente sa silangang Balochistan.
Sa Sindh at sa silangang Balochistan, nakita ng marami sa mga dating nakatira sa mga barangay na maaari nang mapuntahan ngayon na ang kanilang mga dating pinagkukunan ng tubig ay kontaminado pa rin, at kakailanganin nilang pumunta sa malayong lugar para makakuha ng maiinom na tubig. Nasira ang kanilang mga pananim, di na mapakikinabangan ang kanilang mga naka-imbak na pagkain, namatay ang kanilang mga inaalagaang hayop, at ang mga bukid ay di handa para sa susunod na pagtatanim, kung kaya’t tumataas ang posibilidad ng food insecurity. Ang mga Doctors Without Borders team ay nagbibigay ng ligtas na inuming tubig sa mga komunidad, at umabot na ng dalawampung milyong litro ng tubig ang naipamahagi nito. Tumulong rin kami sa pamamahagi ng 15,973 hygiene kits sa mga pamilya sa mga liblib na binahang lugar.
"Ang pagtiyak ng sapat na pagkain, tubig, sanitation, pangangalagang pangkalusugan at masisilungan ay dapat bigyang halaga at unahin sa mga pandaigdigan at pambansang pagtugon sa mapaminsalang pagbaha sa Pakistan," patuloy ni Taylor. "Marami sa mga tao sa mga apektadong lugar ay may mga kagyat na pangangailangang hindi makapaghihintay."
