Tatlong tanong: Ang paggamot sa cervical cancer sa harap ng mga limitasyon sa Malawi

Paano gagamutin ang kanser kung walang radiotherapy? 

“Ang radiation therapy ay kadalasang unang lunas para sa cervical cancer, ngunit sa kasalukuyan ay wala nito sa Malawi. Nitong nakaraang dalawang taon, nakabuo ang Doctors Without Borders ng paraan ng pangangalaga na kombinasyon ng chemotherapy at surgery. Pagkatapos ng tatlo hanggang anim na chemotherapy cycles, nagiging maliit na ang mga tumor at maaari nang tanggalin sa pamamagitan ng pag-opera o surgery, na siyang sasagip ng buhay ng pasyente. Wala pang mga datos para makita ang two-year survival rate ng mga dumaan sa ganitong pamamaraan, pero maganda naman ang mga naging resulta nito, at inaasahan naming mapapahaba nito ang buhay ng pasyente nang halos kasinghaba rin ng makukuha niya kung siya’y sumailalim sa radiotherapy. 

Sa mga bansang limitado ang mapagkukunang-yaman, ang ganitong paggamot ay itinututuring na mabuting alternatibo sa radiotherapy, basta’t may mga bihasang surgeon na makakagawa ng operasyon. Kaya naman binigyan namin ng partikular na atensyon ang pagsasanay ng mga surgeon sa mga advanced surgical procedure tulad ng hysterectomy, kung saan tinatanggal ang isang bahagi ng matris, o ang kabuuan nito. Dito sa aming proyekto, buwan-buwan ay nagsasagawa ang bawat surgeon ng humigit-kumulang 14 na hysterectomy, at sa kabuuan, 40 na iba’t ibang surgery. Ang resulta nito’y nagiging highly specialized ang kaalaman ng mga surgeon na ito, at nagiging mas magaling na sila sa larangan ng onco-gynaecological surgery kaysa sa mga katulad nilang doktor sa Europa, kung saan bihirang kinakailangan ang ganitong klase ng operasyon. Dagdag pa rito, natitiyak namin ang kalidad ng paggamot sa pamamagitan ng iba’t ibang disiplina—may anatomopathologist, oncologist, surgeon at mga supportive care team na nagbibigay ng social at psychological support, physiotherapy o palliative care. 

May isa pang kategorya ng mga pasyenteng may cervical cancer, at ito iyong mga nasa advanced stage na bago natukoy ang kanilang sakit. Isinasangguni namin sila at binibigyan ng pondo para makapunta sila sa Kenya kung saan maaari silang sumailalim sa radiotherapy. Pero ang ganitong pagsangguni ay nangangailangan ng maraming pondo at hindi kayang maibigay sa maraming mga pasyente. Sa pagtatapos ng 2023, layunin naming magkaroon na ng radiotherapy sa Malawi upang mapadali ang paggamot ng mga babaeng may advanced cervical cancer.”  

Ano ang magagawa ng pagbabakuna? 

“Mahalaga ang pagbabakuna dahil ang cervical cancer ay madaling pigilan. Ito ay isa sa mga iilang kanser na may kaugnayan sa isang virus, ang human papillomavirus (HPV), at mayroong epektibong bakuna laban sa ilang HPV. Ang isa pang paraan upang maprotektahan ang isang tao laban sa kanser ay ang screening, na hindi lang paraan ng paghadlang kundi unang yugto rin ng paggamot, dahil ang pre-cancerous lesions ay maaari ring gamutin sa puntong ito. Ang bakuna para sa HPV ay makukuha sa pamamagitan ng mga pandaigdigang mekanismo tulad ng GAVI, pero ang mga routine vaccination sa mga health centre ay hindi madaling makakaabot sa pinupuntirya nitong populasyon sa Malawi – mga batang babaeng edad 9 hanggang 13. Hindi sila pumupunta sa mga health centre dahil hindi naman sila nagkakasakit, kaya’t kailangan silang bakunahan sa kanilang mga paaralan, o di kaya’y sa mga barangay para sa mga hindi nakakapag-aral. Ang mga ganitong sistematikong programa sa mga paaralan at komunidad ay nangangailangan ng karagdagang pondo. Patuloy naming susuportahan ang mga programa ng pagbabakuna, katuwang ang Malawian Ministry of Health, na ginawa rin namin noong Enero, nang binakunahan namin ang 17,000 na kabataang babae sa distrito ng Phalombe.”