SI Dr. Javid Abdelmoneim sa Aquarius, isang barkong pang search and rescue, nung 2016. Central Mediterranean Sea, July 2016 © Alva Simpson White/MSF
Dr Javid Abdelmoneim, International President ng Doctors Without Borders. Geneva, Switzerland, Setyembre 2025 © Pierre-Yves Bernard/MSF
Bukod sa kanyang mga gawaing humanitarian at medikal, si Dr. Javid ay isa ring batikang tagapagtanghal sa telebisyon. Nakakuha siya ng nominasyon sa Emmy at sa BAFTA Awards para sa kanyang pagtatanghal sa dokumentaryong pang-agham at sa isang seryeng pangtelebisyon ukol sa kalusugan na ipinalabas sa Netflix, BBC, HBO, Channel 4, at sa Al Jazeera English.
“Binabati namin si Javid sa kanyang pagkakahalal at malugod namin siyang tinatanggap sa kanyang pagsisimula bilang International President,” sabi ni Christopher Lockyear, ang Secretary General ng Doctors Without Borders International. “Ang kanyang malawak na karanasang medikal at humanitarian, at ang kanyang mga kasanayan bilang dalubhasang tagapagsalita sa publiko, ay magagamit niya nang husto sa pagiging kinatawan ng Doctors Without Borders at upang pamunuan ang aming mga pagkilos sa susunod na tatlong taon.”
Si Dr. Javid ang hahalili kay Dr. Christos Christou, na kakatapos lang ng ikalawa sa pinahihintulutang dalawang termino ng panunungkulan bilang International President ng Doctors Without Borders, isang posisyong kanyang hinawakan simula noong Setyembre 2019.
“Kahanga-hanga ang serbisyong ibinigay ni Christos bilang International President ng Doctors Without Borders, at ang kanyang walang kapagurang paninindigan sa loob ng anim na kadalasa’y mapaghamong taon,” sabi ni Lockyear. “Tinupad niya ang kanyang tungkulin at naging kinatawan ng Doctors Without Borders na may walang humpay na dedikasyon sa sangkatauhan, at nagtawag-pansin sa ilan sa mga napabayaang krisis sa mundo."
